自助山 (南灣)

 

 

 

第二次黎到新葡京嘅自助山食，上次係零九年嘅事，本來覺得幾好，但係今次完全失望，仲食到有火。

火係因為啲人唔排隊，一個人排十幾人插入黎，一攞就攞哂成盆，大家文化唔同，真係好難同啲強國人爭食，除非自己都一樣做啲無品嘅行為。

唔講咁多，講左食物先。 其實一向都唔太食自助餐入面啲熟食，所以主攻魚生同點心。魚生好新鮮，好味，有三文魚，呑拿，魷魚，墨魚，紅鷄魚。壽司就有太卷，蛋，鰻魚等，都幾多款揀。幾好，不過略微唔夠醋味。

點心食左蝦餃，燒賣，雲吞咁。好食，大大粒，蝦爽口，彈牙。

另外個印度咖喱加薄餅都值得試，咖喱嘅香料味同辣味好正。

沙律有新鮮生菜（不是西生菜），加上紅腰豆，粟米，麵包糠等，再配沙律醋一流。 東蔭功湯略鹹，凍檸檬茶忘了走甜，都ok啦。 轉戰甜品，芒果糕，紅豆糕，椰汁糕同桂花糕都幾得，甜度適中，滑口。

芝士蛋糕必食！超正！！New York cheesecake啲芝味勁濃，又無過硬，滿分，另外black forest，rasberry，chestnut等都好正，要食。

還有這個coffee jelly都好正，好似食緊齋啡，但係又唔苦，上面加左淡奶，正！

新鮮煎起嘅pancake都好食，料自己加。

雪糕就普通啦，雪山雪糕，ok嘅，topping可以自己加。

仲有架綿花糖機，排太長龍所以無試。

總括黎講食物係ok嘅，無左我至愛嘅生蠔，比嘅份量亦細左，其實都係任食，點解要唔比人呢？排魚生同鮑魚時，啲分野嘅侍應真係著塊數比你，三文魚比三塊你，比多左一塊個侍應都係你個碟到夾返走……仲要口黑面黑，我係黎食野唔係黎受氣囉。

有小朋友點朱古力火鍋時，張自己食過嘅竹籤篶下一件食物，身旁嘅大人無阻止，仲篶埋一份，個朱古力噴泉就係咁沾上他倆嘅口水……

仲有，兩個鐘嘅時間太短，排隊都佔左大部份時間，食客同侍應都無禮貌，成個澳門大把自助餐揀，我唔會再返黎囉。