Cafe Society Coffee Shop (尖沙咀)

 

 

 

行過見到有個自助沙律嘅晚餐牌，百幾蚊就有自助餐食，幾吸引喎，入到去發現原來係酒店嘅餐廳。 環境好乾淨，只有幾枱客，見個外藉侍應咁有禮貌一於試下啦。

餐湯，沙律，餐飲同甜品都係自助，主菜就選左白汁煙三文魚天使麵。 周打蜆湯，好濃，浦面汋都勁好料。而餐包有三款方包揀，白，麥同蛋包。旁邊有多士爐同牛油，熱多士，好味。 沙律吧有生菜，粟米，紅腰豆，車厘茄，三色椒，呑拿魚烚蛋。而醬料有黑醋，海撒醬同千島醬。仲有芝士粉，麵包糠同煙肉乾，一間少少嘅餐廳都幾多野揀。好新鮮，而且耐唔耐就refill，唔使搶食。 主菜到了，真係意外地大盤！個汁好‘傑’，又多三文魚，雖然係切碎左，但由面到底都有，食左一半已經超飽肚，要食返啲黑醋沙律中和下。 甜品係芝士蛋糕，同甜麥提子包，唔使講，梗系攞塊芝士蛋糕試下啦。藍苺醬好味，不過蛋糕部分唔夠芝士味，有啲似食緊鬆餅。 餐飲有紅茶同咖啡，可自加檸檬，奶，好可惜唔夠熱，半溫呑，失敗。

餐廳九點半收，不過九點倒已經要埋單，加埋一都係一人一百蚊倒，好抵食。