新星海鮮酒家 (旺角)

 

 

 

今年的團年飯又係新星食，由舊年八圍加到九圍，環境更迫，連行都有困難，啲侍應上菜亦有難道。

七點開夕，但等唔齊人，最後成九點先開始，勁餓，頭兩道菜影唔到相就食完…

第一樣，燒味併盤，有雞、鴨、叉燒、燒肉、海哲、豬耳。各樣都幾好，唯鴨太肥，一口油。

帶子花枝腰果炒西芹(唔知真名係咩)，腰果好淋，西芹又好生，帶子炒濃左，麻麻。
發財好市大利，呢個全晚最正。蠔豉好肥美，牛脷又淋又入味，豆苗嫩得黎仲食到佢嘅鮮甜。
炸蝦球，好大粒！好彈牙，杏仁片香口，正。
翅？
冬菇鴨掌，鴨掌有胡椒同五香粉味，同一般食開嘅唔同，好味。冬菇厚身，爽，有口感！
蒸班，侍應實在太手快，一上枱就分好，想影張靚仔相都唔得。肉嫩鮮甜，啲蔥最正。
鹹雞，有啲似鹽焗雞，好滑又無肥膏，不過食到呢度已經好飽，無乜人起筷了。
糯米飯，好入味，臘味粒唔少，煙煙韌韌好正，雖然係有啲油。
依麵，淡而無味，而且好水，唔掂。
紅豆沙，紅豆同水分離，勁甜，唔掂。
笑口棗同腰果曲奇，脆，香口，有牛油味，幾好。
最後，勁係要有柑執啦。

九點開始食，十點半食完，中途侍應不停問使唔使分，仲要唔要…成碟都未夾過點會唔要呢？食淨嘅曲奇等勁快手用膠袋袋起，仲放入櫃桶…唔會循環再食掛？

預備埋單，侍應話佢放十點工，已經做多左，真係辛苦哂喎！