一間好靜局嘅麥記，唔使排隊，燈光紛暗，地方又大，想一個人靜靜地食野嘅好選擇。

叫了麥飯卷餐，上次新出無試，今次返出即刻要食下啦。有雞肉同牛肉揀，今晚揀左牛肉。 牛肉麥飯卷套餐配雪碧 （$28）
飯卷意外地大卷，好重。打開一看，啲飯多到擁出黎。牛肉切成幾小塊，排滿整條飯卷。醬汁有啲似將軍漢堡，甜甜酸酸又少少鹹。飯吸左汁後變得有點爛，太軟身。而且個皮包唔住啲汁同飯，一路咬一路跌，怕啲汁滴到周圍係，食得好狼狽。

薯條很少而且炸到很黑，但勝在夠熱，ok啦。

雪碧正常。

第日又黎試另一款新野，同樣係無人排隊買野，正。 黑森林脆脆新地 （$7）
其實係朱古力醬加士多啤梨醬，無左花生多左脆脆，而啲脆脆感覺似係新地筒整碎左咁，無驚喜，好處係當揀唔定要朱古力定士多啤梨味時可一次過要哂兩種。

麥飯卷真係好飽肚，感覺上飯嘅份量仲多過麥脆飯。呢間啲雪糕夠凍，唔似上次間一買就滆哂。唔知係咪少客，店員態度異常地好，哈哈。