因為某茶樓壞了冷氣而來到名門飲早茶，等一陣就有位，非常近門口，無乜冷氣，係三十幾度嘅天氣下，真係出哂汗。算，唔理咁多，叫左點心先。

早茶，午市同下午茶時段都有多款特價點心，好平！午市仲有是日炒粉麵飯，見到其中一樣係咖喱豬扒飯，真係笑左。無諗過係茶樓都有呢樣食，同茶餐廳爭客？ 燒賣，啖啖肉，無乜肥膏，ok。
沙薑雞腳，媽媽最愛，佢話好入味好正，我略賺太硬。
蘿蔔糕，好多蘿蔔絲，但比較散，味道唔差。 炸雲吞，炸得好脆但有少許油益味，醬料唔得，得個酸字。
煎菜肉包，雖然包身厚但味幾好。
脆肉瓜雞絲腸，腸粉韌有彈性，甜豉油好味。 煎腐皮卷，好油好炸，賣相亦差，不好吃。
鮮蝦菜苗餃，太淋好爛，味道可以。
煎腸粉，腸粉煎得好香口，有不少蔥花同蝦米，配上豉油同甜辣醬好味。
炒米粉，雖然少料白哂哂，但味唔差，米粉好韌。 牛肚，好入味，份量又唔少。
蝦餃，飽滿鮮甜，$8.8四粒大大粒，抵食啦。
炸春卷，新炸起，香脆。
藥膳雞腳，又淋又入味，湯底啲藥材味好勁。

茶水夠滾，食物有質素，唯樓底矮好嘈，伙計亦唔夠無人沖水，又剛好坐在門口位非常熱，種種原因，只能給個ok了。