打完波，好肚餓，想食肉食，想起大家樂嘅鐵板餐，啖啖肉都係一個好選擇喎，就黎左試下。

時間尚早，食晚餐嘅人唔多，落完單，一陣就有啦。

熱騰騰嘅鐵板，倒汁落去咋咋聲，香味四起，立即垂涎欲滴
。不過鐵板油粒彈到周圍係，油膩膩，中哂招。 酥皮湯，紐西蘭爵士牛，黑椒汁，雪糕紅豆冰（$60）
牛扒幾大塊，厚切，不過無牛味，太多鬆肉粉？好淋好怪。黑椒汁太鹹，亦無乜黑椒味。紅豆冰則幾好，豆唔夠淋，但味道調得啱。 酥皮湯，雜扒，意大利蕃茄汁（$49）
雜扒有豬扒，腸，魚肉扒，同薄牛扒一塊，份量幾多。豬扒軟淋又有肉汁，好食，其他就一般啦，塊薄牛扒意外地有牛味，某程度上，我覺得好食過塊爵士牛。蕃茄汁好酸，另份扒餐無咁漏，唔錯。

最期待嘅酥皮湯則非常失望……酥皮鬆軟滿牛油香，好好食，但個湯完全唔掂！粟米湯太傑大甜，感覺似飲緊啫喱，而且充滿著人工甜味，真係自己開個罐頭湯都好飲過佢。

價錢幾抵食，但尚有改善空間。

食完行返出黎，個身一陣鐵板燒味，好油吖。