見雜誌有介紹過呢間米線舖，特登黎試下，點知中伏了……

同友人一點幾黎到，只有幾個人，雖然都坐哂咁多張枱，但離滿坐仲好遠。由於友人已吃午餐，得番我一個人食，諗住叫一碗米線加飲品就算，但個老闆娘黑哂面咁，咁好啦，叫多個小食，小食也同米線同價，咁ok未？

叫得個舖名做豬扒酸辣米線，係招牌菜，咁就叫呢樣啦，另加了雞亦同凍利賓納。 凍飲好快到，係有汽利賓納，好細杯，而且半杯係冰，其實冰都唔平，唔駛咁客氣比半杯冰嘅。 等左一陣就到嘅豬扒米線，先飲一口湯，一啲都唔酸，得辣，仲係麻辣，無諗過酸辣原來係咁味。試一口豬扒，完全無特別，又韌又乾，用左大量味精，香料同鬆肉粉，是但入一間食店都整得好過佢，呢啲就係招牌菜？ 雞亦等多一陣都到啦，信佢係即整嘅，因為好熱。豬扒上時已經凍，係整定，但雞亦就係即叫即煎，仲熱，不過呢樣都係唯一嘅優點。雞亦同豬扒嘅醃料係一樣嘅，完全一樣味，同樣煎得很乾，仲勁多油，碟底有成湯匙油。

食完之後超口渴，雖然唔係鹹，但之後飲左成四杯水，呢種口渴絕對係味精做成。

一個人食個晏居然都食左六十幾蚊，仲要啲野唔好食，坐位又唔好坐，啲筷子用紙巾抹完後塊紙巾黑哂，甩色？而且老闆態度又囂張，我諗唔到有咩理由要返黎食囉。