無啦啦話要入流浮山食海鮮，於是到左附近買定啲海鮮再去酒樓加功，無乜特別食開邊間，見老闆娘好有誠意就入呢度啦。

整個流浮山啲酒樓望落差唔多，舊式舖，唔會有太多花巧野，環境雖然麻麻，但總算乾淨。 攞哂啲海鮮去加功之制，老闆娘送左個芥菜豆腐魚湯，好鮮味，但凍左後有少少腥。 東風螺，清蒸嘅都無技巧可言，螺鮮味，雖然唔係好大粒。 椒鹽瀨尿蝦，揀左幾隻大大隻嘅，啖啖肉好正，但椒鹽相當重手，好鹹呀。 炒通菜，好鮮綠亦很油，但出黎食都預左。 蒜容蒸扇貝，勁多蒜，豉油同油，粉絲吸哂啲汁好正呀，但又係偏鹹。 清蒸膏蟹，好多膏，蟹肉鮮甜，大大隻，食得好滿足。 豉椒炒聖子，殼放底感覺上大碟啲，味道一流。聖子鮮又爽，唔韌，不過又係鹹左啲。

除左食海鮮，勁係要返啲肉，去親酒樓都叫嘅生炒骨。 菠蘿同個汁都偏酸，肉方面，粉唔厚亦唔係返炸，都幾好食。 再加多個乾燒伊麵，燒得香口，大大碟，豉油同樣重手，食到底好鹹。 食完後有生果送，橙一碟，有酸有甜，睇你好唔好彩攞到邊塊囉。

雖然係鹹左啲，但呢餐食得好滿足。