親戚相約到南丫島食海鮮，順便當係去下旅行，水清沙幼，好靚呀。

午餐到了富記開餐，環境唔錯，好有大自然feel。

叫左十幾樣野，有清蒸有濃味，一於食盡啲。

先黎幾樣小食，花生，酸瓜等，開開胃。 白汋蝦，鮮甜，蝦味濃，仲有唔少蝦膏，好味。 蒜容蒸扇貝，蒜容粉絲比例剛好，加埋豉油，一口吞一隻正呀！ 薑蔥蟹，汁濃而不鹹，蟹肉鮮嫩，好好味，連蔥都食哂。 辣味東風螺，入味有咬口，唔錯。 油魚二食，起肉炒西芹，肉嫩且彈牙，西芹爽口，又係好快食哂。 另一味係果皮豉油蒸，賣相麻麻，果皮好香，魚蒸得剛熟，好鮮味。 炒聖子，味道唔錯個略微炒得過熟，有點韌。 椒鹽鮮魷，粉唔厚，啖啖肉，彈牙，但可以再多啲椒鹽更好。 楊州炒飯，用上大蝦炒，蝦好爽口，但飯太散，味道一般。 最後有果盤，砌得幾靚！新鮮生果食多啲都無妨。

叫左啤酒汽水等，埋單約二百幾，食到飽飽好滿足吖！