今日要係銅鑼灣辦點事，特意提早到咖啡弄排隊，本來諗住開業已有一陣子，唔使排咁耐啦，點知我錯了。

十一點幾鐘黎到，人龍已長到數字便利店，十二點先開門，好誇張。一場黎到，唔等白唔等，事前打過電話黎問，無得book位無得派飛，只可排隊了。

十二點開門，好快行到去大厦門口位，見條龍短過一蘭，仲估會好快添，我還是錯了。

天氣酷熱，零通風，等到出哂汗，過左一個鐘條龍都係無行過。兩個鐘，先去到樓梯口，一度想放棄，但等左咁耐又好唔抵。

三個鐘，終於到左店門口，店員話下張到我了。但呢個一下張，都要等上二十分鐘。中途見唔少人walkin就有位，又話唔比book嘅？

點都好，等到成身汗，有位了，窗邊第三張，對住廚房位，好光猛。

叫野食先，好肚餓呀，早餐等到下午茶。食物方面，輕食為住，飲品種類頗多選擇。 里肌起士可頌（$62）
一點即到，肯定好多人叫呢樣所以整定。牛角包微温，鬆軟，好重牛油香。夾住火腿，半溶嘅芝士，粟米同少少煙肉乾，呢幾樣都係我嘅至愛，勁好食。不過呢碟野……真係完全無難道，自己都整到，感覺上好唔抵。 咖哩牛腩（$68）
超失望！牛腩並不淋，切到細細粒，無口感。咖哩汁好水又好辣，加上份量極少，三四粒牛腩，兩舊大薯仔，配上四片薄切法包。法包又乾又韌，凍上，一啲都唔好食。呢樣佢話係每日限量，唔知係咪咁，所以質素麻麻？ 冰鮮果茶（$58）
大量鮮果，冰凍解渴，一大jar兩個人飲都夠。 熱鮮果茶（$58）
熱版，味道不級凍飲，熱食生果好怪。凍飲淡啲，熱飲太甜了。雖然有個茶包掛住，但一啲茶味都飲唔出。

起初入店都覺得幾涼嘅，出面真係太熱，但食住野覺得越黎越熱，唔夠冷氣。加上廚房勁嘈，個攪拌機大聲到成個轟炸機咁，連坐對面都聽唔到講咩。附近啲人都要提高聲浪去講野，仲嘈過去茶樓。

至於你話店員喎，我都覺佢地有禮貌嘅，不過除左落單同埋單，成程都唔得閒，佢有無禮貌都影響唔大啦。

野食ok但期望越高失望越大，食唔出有咩咁特別要排三個鐘，出面街都食到……朝聖，一次便夠。