行過好多次淘大都無留意都有呢間熱狗店，外面燈光太暗，招牌又唔起眼，難得今日發現佢嘅存在，又唔想食粉麵飯，一於比個機會佢啦。

熱狗選擇頗多，仲可以加錢轉成餐，廿幾至四十幾蚊，都算平。因為友人話唔餓，只叫一個餐加多隻熱狗算了。

個收銀唔知係新黎，定係我問得奇怪，問佢轉成餐A餐飲有咩揀，佢話你見到張menu有咩咪咩囉……但係你個雪櫃又寫住唔知咩無貨，個隻字甩左色，算，要可樂一定有貨。

比完錢，收銀話等叫號，ok揾位坐先。全部枱唔係有人坐緊就係有食完嘅野無人執，全間店得個廚同收銀，廚就忙到痴線，但個收銀就企係到發呆。唯有自己執，但個垃圾桶滿左，都唔知執完擺邊好。好無品咁擺哂係隔離張未執嘅枱啦。 等左成廿分鐘先有得食，即叫即整好熱喎，不過麵包烤定，涼了，其他ok。 辣肉醬酸瓜熱狗
唔講得少，堅辣！而且酸瓜太酸，但半溶芝士配熱烘烘腸就好好味，掉咁啲醬同酸瓜就好啲。 蘑菇熱狗
每日都有一款特價，星期六係呢款，本身都鐘意食蘑菇諗住叫呢隻，感覺抵左哈哈。
不少蘑菇片鋪係腸仔上面，加埋厚厚一層千島醬，幾好味，不過又係酸左啲。黄色嘅千島醬，我覺得可能加左芥辣醬入去？ 肉醬薯容
肉醬淡啲，都ok，薯容就大眾貨，屋企買返去開粉都做到呢隻味。

總括黎講都幾好嘅，仲有好多隻熱狗味想試，有下次。