爵士拉麵在粉嶺頗有名氣，店內坐位很少，營業時間又短，要食到真係唔易。是日難得佢開門，條隊又唔算長，一於排下佢。 餐牌，都叫幾多款拉麵揀，湯底都有三種。睇下睇下，原來不可以落第二次單，茶位仲要收一蚊，咁怪嘅，未試過拉麵舖要收茶錢。

難得黎到，叫番個招牌拉麵先，要A湯底，大size。 札幌味噌湯底，微辛？完全食唔出，一味死鹹而已，唔知係咪一次有十幾碗麵落單，懷疑佢落錯湯底。
拉麵煮得頗硬身，不錯。
配料方面有很多，肥牛一堆，叉燒三片，粟米，紫菜一小片，滷水蛋半隻，海帶，人做蟹柳一開二，仲有少許蔥花。
叉燒全瘦，無肉味亦很韌，唔掂。
蛋滷得太耐同樣很硬，又無蛋味，麻麻。

總括講句，很大碗，料很多，但味道不好。

八十五蚊一碗，加兩蚊湯底，再加一蚊茶錢，另加排隊時間，換來一碗十分飽肚但食後要飲五杯水嘅超鹹拉麵，抵不抵食，見仁見智了。