又到銅鑼灣行街，等陣會到皇室堡睇戲，順便係度食埋晏先。黎左咁多次都唔知地庫有間元氣，落到黎，唔係好多人等咋喎，等左十幾分鐘就有位。唔係坐bar枱，比左個四人卡坐我地，好濶落。

間餐廳無乜人講野，店員以極速出現同消失，想揾人落單都幾難，迴轉帶上的壽司又比人攞到空空的，無咩好揀喎。

終於都落到單，點左平時叫開嘅，同今期特色嘅。 飲住綠茶等食。 日式燉蛋 $18，質素依舊，火候剛好。 前面一排是我點的，後面一排軍艦是友人點的。
箱押蒲燒秋刀魚 $16， 個汁好似鰻魚汁，定係其實一樣？魚好肥美。
玉子 $10， 甜甜的好食。
三文魚 $13， 好薄切，色澤亦唔靚。
海膽墨魚 $16， 海膽味有少少怪，唔新鮮。
數之子 $16， 無特別嘅期間限定。
飛魚籽 $16，新鮮，爽！
芥末八爪魚 $13， 芥末味調得唔錯。 後加一份蟹柳沙律船 $13， 甜甜酸酸，好味。