新年出旺角行花墟，置在同人迫下，預左買唔到野。行完轉戰花園街，真係好多人，想買串魚蛋都要迫迫迫。 叫左一個細牛雜（$12），兩串魚蛋（$5），價錢真係幾平，唔怪得咁多人。

牛雜一早剪好哂，叫嘅時候拖拖水，咁樣到ok熱，而且入味。有牛肚，牛肺，豆卜，蘿蔔等。蘿蔔無渣最好味。

魚蛋就麻麻，唔彈，又無乜味。要辣先加咖哩汁係上面，個咖哩汁就幾好。

企係街食嘅人好多，迫到條路無得行。買野嘅人又唔排隊，大家都係叫入去，唔惡都買唔到。