放工後想去吹吹水，決定黎番本食放題，可以一路食一路傾，而且兩個鐘可以食飽飽。

Book左枱都仲要等，好旺好多人。枱唔算排得迫，至少枱同枱中間仲有位出入，同隔離有返啲私隱。

order紙一大疊係枱面，好方便，食物種類都幾多。加多五十蚊可以有多啲款，好似赤蝦，蟹粥咁，但我對甲殼類敏感，所以都係唔使星級啦。

一坐低就係咁寫寫寫，好多野都想食，第一輪小試牛刀先，樣樣落少少，睇睇咩環境先。 好快就上枱嘅刺身，賣相唔錯，插住紮花，有冰底。好新鮮，算係幾肥美，雖然切到好細塊，但厚切，比足寫嘅份量。 味附螺同一般舖頭買到嘅無乜分別。
麻醬豆腐，豆腐嫩滑，加埋呢隻日式麻醬真係幾好味。 炸餃子同雞軟骨，炸得香口唔算油，雞軟骨細細粒唔鹹，一啖一粒。
炒魷魚鬚，無乜驚喜。 牛油帆立貝，鮮甜又有牛油香，唔錯。
薯波，真係一粒薯仔，好粉。 焗黃金蠔，蠔size頗細，醬汁酸酸鹹鹹又幾好味喎。
一口牛，好肥美，無泎，好食。 黑松露温泉蛋，賣相唔錯，可惜冰凍嘅，蛋都幾香，暖返啲更好。 清酒煮蜆，酒味好濃，我唔like。 燒多春魚，好香口，無死炸，好食。 各式天婦羅，個人覺得番薯最好食，茄子同南瓜都幾好，炸蝦無試。 第二輪落order嘅刺身，好似比多過我寫嘅份量。今round加多左吞拿同螺，同樣新鮮好食。 人蔘雞湯，出奇地濃人蔘味，不過鹹，就不口渴，似乎不是味精湯。 芝心年糕，炸得外脆內軟，半滆芝士原來同年糕好夾，好好食，但一件就好飽肚，建議大家share食一個。
芝士魚蛋？唔記得左係咩名，類似炸魚蛋入面包芝心，甜甜地幾好味。 日式煮蜆，醬汁甜甜的，蜆鮮嫩，我覺得好食過清酒辦。 串燒，叫左燒冬菇，翠玉瓜，粟米同大蝦，黎唔切影相已掃清。冬菇同翠玉瓜燒得剛好，仲有好多汁，呢兩樣番叫左。蝦有啲苦，粟米加少少牛油更好。 壽司叫左北極貝，海膽蝦，鰻魚，同花之戀。飯軟綿有少許醋味，細細件好精緻，食多幾件都唔覺飽，唔似其他放題大大舊飯。 食到尾聲更係要返啲甜品，燒菠蘿，十分甜，size剛好，又係encore之選，但都係影唔切相。 仲有雪糕糯米滋，綠茶，香芋口味。雀巢雪糕，朱古力，芝麻同雲呢拿。呢幾樣都係standard無乜特別啦。
芒果布甸，超級甜，唔堆介。仲有一樣叫炸朱古力香蕉，想試but太飽，下次先啦。

食物都幾多款又好味，環境ok，員工仲適講笑，氣氛唔錯，再有朋友聚會會再揀呢間，不過一定要記得book位，我地等枱其間有人發爛話上網book左但無confirmation，死都要枱，搞到派位姐姐勁難做。