有點事做出左黎尖咀，行下行下過左尖東，呢邊真係靜好多，無名牌店亦少有連鎖店，順便係度食埋晚飯先，唔使等位good呀。

見到半島中心有個餐牌棟係度，打冷小炒都係四十幾蚊起，尖沙咀黎計好平喎，試下先。

間舖係地庫，都幾易揾，去到，有幾枱客，環境幾乾淨，但好似黑左啲唔夠光猛，好彩伙計幾友善，叫我地隨便坐。

友人話想食墨魚，咁好啦就食打冷野試下先。


鹵水墨魚片 $45
幾平喎，出面打冷墨魚要貴好多，份量唔少，底有大豆芽菜。墨魚片鮮甜，厚切有口感但唔韌，唔算好入味，不過浸下鹵水汁食ok。大豆芽爽脆，好味。


另一樣要左鹵水鵝腸 $43
本來想叫正鵝，但友人唔食鵝，咁改叫鵝腸。呢個係豆腐放底，鹵水汁味一樣，鵝腸爽，豆腐幾滑，兩者都好味。


仲要左一窩蠔仔粥 $59
好大窩，芫荽好香，有好多蠔。


蠔仔好大隻，肥美鮮甜。粥幾好味，略微鹹左少少。

雖然唔係好正宗潮州野，但都幾好味，大大碟價錢又唔貴，抵食吖。

堂食等位時間: 0 分鐘
用餐日期: 2014-09-06
是次消費: 每人約HK$74 (晚餐)

評分: 味道 4 環境 3 服務 3 衛生 4 抵食 4