地域之枝 (粉嶺)
同事介紹黎free cafe食，開頭聽個名以為係西餐廳，點知原來係食日本野，有少少西式甜品咁。個中文店名同英文店名好似完全無關？！真係百思不得其解…
午市都幾多野揀，有就咁碟飯，有定食，有一人火鍋，幾乎你諗到嘅日式食品都有。
叫左吉列豬扒咖哩飯，有麵豉湯送。
豬扒炸得幾鬆軟，炸粉唔厚，好大塊。但咖哩汁完全係咖哩磚個隻味，仲要超傑身好似食緊啫喱咁。飯不夠熱，無飯味。
牛仔骨定食，有三樣配菜，中華沙律，玉子豆腐，淹黄瓜。中華沙律無特別唔難食，玉子豆腐嫩滑同帶少少鹹味嘅汁幾好味，淹黄瓜好味精。牛仔骨調得好好味，甜甜鹹鹹咁，但有啲韌難咬開，份量好多。飯同上，落左少少黑芝麻賣相靚左，呢碗比較熱好食左。
麵豉湯，有海帶，豆腐，蜆肉等，都幾好飲。
魚生飯，好大碗，魚生都好多，好大片，唔係出面啲切埋啲頭頭尾尾。幾鮮味，有魚香，好肥味，唔錯。
隔離枱唔小心打瀉左碗麵豉湯，侍應係零反應，無拎野黎抹，又無執番個碗，企左係度發呆。
落單又係，講左三次都係零反應，企係度揸住本簿，眼神空洞，唔知佢諗緊乜……
堂食等位時間: 0 分鐘 (堂食)
用餐日期: 2014-09-29
是次消費: 每人約HK$55 (午餐)
評分: 味道 3 環境 3 服務 2 衛生 3 抵食 4
|
