有位住在元朗嘅友人介紹黎呢間泰國菜度食，原本以為好地道，點知間餐廳裝飾得幾靚，小吊燈，射燈，仲有牆上嘅掛畫，有泰國特色得黎又唔乞突。
同行友人大愛呢度啲吊燈
欣賞完環境，又係時候睇下餐牌，好多野食下喎，仲有二人同四至六人嘅套餐，價錢唔貴。不過最後都係決定散叫，價錢差唔多，又可以揀自己鍾意食嘅野。
叫左兩款飲品，左邊係菠蘿特飲($28)，右邊係椰青($38)。
菠蘿味不濃，似係菠蘿汁加冰加水，解辣不錯，賣相幾靚。見隔離枱叫左石榴特飲，粉紅色的，望落都好靚呀。
椰青夠凍又清甜，原個上，友人話入面啲椰肉好正喎。
細嘅冬蔭功湯($68)
細細壺都好足料，有幾隻蝦，菇等等。飲落香甜好滑，應該有落奶，好creamy好飲呀。唔知係咪叫左少辣，我覺得碗冬蔭功湯完全唔辣，又唔太酸同鹹，同平時飲開嘅唔同。
串燒六串，牛豬雞各二($68)，可以自由揀全牛豬或雞，又或者各三等。咁幾好，唔使好似另一度咁一叫要同款半打。
串燒嘅牛同豬比較乾，雞就幾juicy，調味不錯。點埋沙嗲汁色仲正，呢度啲沙嗲汁稀啲，花生味不太濃，少少辣。
班蘭咖哩，揀左豬($78)，薄餅($42)，叫得咖哩梗係要叫埋薄餅，要點汁食先正吖嘛。咖哩有紅，青，黃同班蘭揀，仲可以揀牛豬雞，我地要左班蘭豬咖哩，感覺特別啲。
黎到，真係好香班蘭味，好香。咖哩汁甜甜辣辣，入面啲豬肉厚切，但有啲韌，主角係咖哩汁，肉就可有可無。
薄餅一碟有四塊，上枱砌到花形咁幾靚。餅鬆軟又有口感，點汁食真係一流。
炒茄子($48)，友人同本人都好鍾意食茄子，比起炒菜，更想試下呢樣炒茄子。用左豆豉，青椒，辣椒，同其他香葉去炒，熱辣辣夠鑊氣，香口得黎食落又唔覺油，送飯就啱哂。
煙三文魚木瓜沙律($88)，最遲先上嘅沙律，用上高腳杯，賣相十分漂亮，靚到唔捨得食。煙三文魚兩大片，入口鹹香，同木瓜沙律好夾。木瓜絲爽口，少少酸少少辣，可能要求要少辣，我覺得好易入口。入面仲有清甜嘅蕃茄片，花生粒，清爽解膩，好味。
食物同環境都一流，再加上友善嘅侍應，今晚呢餐真係好滿足。
堂食等位時間: 0 分鐘 (堂食)
用餐日期: 2014-11-06
是次消費: 每人約HK$250 (晚餐)
評分: 味道 4 環境 4 服務 4 衛生 4 抵食 4
