喺開飯嘅最新動態得知有間新店叫老點開張，早排行開旺角已經想試，但當日太多人等位，同友人放棄左，宜家元朗都開左，梗係要試下啦。
店不大，雖然未排隊，但都要等兩張枱，好彩兩個人好快有枱。
侍應好快送上茶，無得揀茶，送來的是潽洱，茶味不錯，只是熱度有點不足。枱上餐具精緻，黑色瓦碟好有型。
睇左點心紙，好多特色點心，一般茶樓邊有呢啲野食架。價錢由十幾蚊至廿幾蚊一籠，同茶樓價位差唔多，但呢度由師傅新鮮整起，食都食得安心啲，唔似得某些連鎖茶樓由大陸冰鮮運黎。
兩個人驚要得太多食唔哂，揀黎揀去，要左下面幾樣。
鮮上肉響鈴腸 $24 (6件)
出面好多都係用油炸鬼包蝦膠，呢度幾特別，用響鈴卷，入面有豬肉同蝦，口感十足，腸粉嫩滑。
蟲草花雞缽仔飯 $24
見店名叫得缽仔飯，無理由唔試下佢。一缽上枱，滿滿嘅雞件仲出緊雞油，加埋豉油撈飯一流，真係要講番句雞有雞味。
咸香黑魚子蒸燒賣 $18 (2件)
大大粒燒賣，鮮肉砌成，特別鮮嫩，啖啖肉正呀。
高湯魚翅灌湯餃 $34 (1盅)
一人獨享呢個灌湯餃，十分足料，帶子魚翅竹笙等，皮有咬口得黎又唔係死實實，湯清，不過飲哂啲湯有少少鹹。
戚風班蘭馬孻糕 $18
比佢綠色呢外表吸引住而叫左，班蘭味不强，亦無乜馬拉糕呢感覺，好似食緊蛋糕咁。
脆皮麥心小煎堆 $22 (3件)
推介！煎堆包住綠茶容同麥提莎，創意十分！而且好夾好好味，連平時唔鍾意食煎堆嘅我都要encore！！
一口忌廉焦糖蛋 $9
九蚊一款，最少要叫兩款。焦糖係即燒嘅，微熱，但個蛋仲係凍架，好得意，又熱又凍咁食。老闆話佢啲匙羹特登放埋入雪櫃，等食嘅時候感覺仲好啲，又真係幾細心喎。
香港舖租咁貴，小店真係要善用每一吋空間，呢度啲枱枱凳凳好迫，真係麻麻地好坐。不過野食好食答救，下次帶其他朋友黎先。
堂食等位時間: 5 分鐘 (堂食)
用餐日期: 2015-01-31
是次消費: 每人約HK80 (午餐)
評分: 味道 4 環境 3 服務 4 衛生 4 抵食 4
