萬眾期待嘅世界盃今晚終於Kick Off！趁住呢項盛事展開，作為球迷嘅老孫想同大家講下波。放心！老孫唔係咩球評家，所以唔係想吹埋D咩球賽分析，想講嘅係關於我嘅一D足球故事。

老孫真正開始認識足球，始於廿年前，亦即係1994年嘅美國世界盃。老孫當年仲係細路一名，94嗰屆係我第一次睇世界盃賽事，咁當然講緊睇直播而唔係睇現場啦。而我第一次睇直播睇足全場嘅賽事，就係當屆決賽啦，呢場賽事本身就夠晒經典，加上係我第一場睇足全場嘅世盃賽事，所以印象更加深刻，對我亦影響深遠。

當年決賽，有番咁上下年資嘅球迷應該記憶猶新。巴西有「夢幻組合」羅馬里奧＋白必圖壓陣，係冠軍大熱，意大利就靠堅固嘅後防加上神奇小馬尾金童巴治奧頑抗。嗰屆巴西係一反常態咁專重防守，加上意大利又係好守得，攪到場波精彩攻門欠奉，最後要互射十二碼了斷。結局係點唔駛我講大家都知，好多女球迷都因為巴治奧嗰球十二碼宴客而黯然落淚，而我從此就學懂左一個新嘅詞彙 － 「打飛機」（當然我後來亦好快知道呢個詞彙嘅另一個王道解釋）。

巴治奧打飛機，成為輸波罪人，老孫當時冇為佢黯然落淚，不過都有D唔高興，因為我當年係捧意大利嘅！作為一個認識足球冇幾耐嘅人，正路係好容易就會俾腳法秀麗、號稱足球王國嘅巴西吸引。不過老孫一向有鋪鋤強扶弱癮，成日好想睇到挑戰者打垮皇者嘅一幕（亦即係俗語有謂嘅睇人仆街）。雖然，老孫嘅願望最後落空，不過意大利嘅拼搏精神卻深深吸引住我，再加上巴治奧嘅悲劇又加多幾分同情分，從此我就成為左意大利嘅Fans。

老孫D朋友成日覺得我捧意大利on99，一味穩守突擊悶到爆有咩好睇。佢地嘅觀點我都好認同，不過我亦有另一番見解。進攻，就係要破壞對方嘅防守。相對而言，防守，就係要破壞對方嘅進攻。進攻又係攪破壞，防守又係攪破壞，而意大利隊就係以一班型男好Chok咁攪破壞（回想一下馬甸尼如何包波吧），成件事係型到爆，就只係睇你識唔識欣賞！

大家一定會覺得老孫呢個熱捧意粉嘅理由相當狗屁不通，甚至乎可以用9 up嚟形容。冇錯，老孫自己都覺得好9up，不過睇波就係咁架啦，呢度係球場唔係法庭，為左支持愛隊，球迷就係會如此不理性，呢D亦係睇波嘅樂趣之一！

－－－－－

P.S. 支持老孫創作，就請開心Share啦！

更多精彩內容：www.facebook.com/intothedarknesshk