背部

著露背晚裝，就最怕俾人見到背脊啲肉「Jit」哂出黎，

如果想擁有性感玲瓏嘅背部曲線，可以試下咁做：

1. 兩手叉腰，站立，腰部挺直。

2. 將兩邊手踭盡量拉向身後，同時呼氣。

3. 到極限時Hold住約3秒。

4. 放鬆至原位，同時吸氣。

5. 反覆做此動作10至15分鐘。

肚腩

新娘子如果有個大肚腩，

就好多Cutting嘅婚紗都著唔到，

以下呢Set動作，可以幫助妳減走妳個肚仔咖。

1. 瞓喺一個舒適嘅位置，可以係軟墊或者床上。

2. 將雙腳屈曲墊高，例如可放喺梳化或者床Pan上面。

3. 兩手交叉於胸前。

4. 做Sit-up動作，留意上身毋須抬太高，

大槪45度就足夠，如果夾硬抬至90度位置，

好容易會用錯咗腰力，反而對減肚腩無幫助咖。

5. 反覆做50吓左右。記住係上嘅時候呼氣，

落嘅時候就吸氣。

腰部

兩邊腰間嘅贅肉，亦都係阻礙新娘子揀衫嘅殺星，

想擁有一條苗條纖腰，可以試下做以下嘅動作：

1. 瞓喺一個舒適嘅位置，可以係軟墊或者床上。

2. 屈曲雙腿，腳掌應平放喺同身體水平嘅位置。

3. 雙手握拳，屈曲雙臂，

拳頭抬起肩膀位置，手踭指向前面。

4. 做Sit-up動作，每次抬起身體要快速轉動腰部一吓，

令右手手踭同左膝、左手手踭同右膝，

各快速觸碰一吓，之後先慢慢瞓返低。

5. 反覆做50吓左右。記住係上嘅時候呼氣，

落嘅時候就吸氣。

臀部 & 大腿

臀部同大脾線條如果夠靚，

著起人魚Cutting嘅婚紗晚裝，一定令人眼前一亮。

以下呢Set動作專針對Pat Pat同大脾嘅肥肉而設，

大家不妨試下啦：

1. 站直，挺胸收腹。

2. 原地提腿，做出「操兵」動作。

3. 留意每吓提腿，大脾要抬高至水平位置。

4. 反覆做10至15分鐘，

對收緊Pat Pat同大腿都有幫助！

 

瘦得夠健康

最後，要提醒大家，

呢個世界無乜嘢減肥方法係可以不勞而獲嘅，

要瘦，點都係需要下啲苦功，

所以第一件事就係要趕走身體入面嗰隻懶魔！

而且，如果想瘦得有效得嚟，又唔會影響健康，

除咗要勤做以上提到嘅各動健身運動，

仲要同時配合以下幾樣嘢呀：

1. 均衡飲食。

想知道多啲有關婚前飲食嘅貼士，

可以參考我地上個禮拜嘅《婚前飲食手冊》。

2. 充分休息。

做運動都唔好做到走火入魔呀！

要俾身體有足夠嘅休息，

先唔會出現疲勞過度嘅情況咖。

3. 保持心境開朗。

好多準新娘都有「減肥減上腦」嘅徵狀，

事事都以減肥行先，整到自己乜都做唔到，

咁樣好容易會影響自己嘅情緒咖。

Relax！得閒做返啲會令自己開心嘅事，

行街Shopping，食飯睇戲，用平常心去減肥，

千祈唔好因為怕肥而「潛水」，唔出席朋友飯聚呀，

咁樣收埋自己好容易出事咖，

老實講，今餐食多咗，咪做返多啲運動，

下餐食返少啲囉。No Big Deal！

都係嗰句：籌備婚事又好，護膚又好，減肥又好，

各位準新娘，無論婚前做任何事，最緊要開心呀！

 

下個禮拜，我地會送上《四季新娘妝容》特輯，

教大家喺唔同季節應該化啲點樣嘅新娘妝，

各位準新娘千祈唔好錯過呀！

By Brides Talk