| «‹ September 2017 ›» | | S | M | T | W | T | F | S | | | | | | 1 | 2 | | 3 | 4 | 5 | 6 | 7 | 8 | 9 | | 10 | 11 | 12 | 13 | 14 | 15 | 16 | | 17 | 18 | 19 | 20 | 21 | 22 | 23 | | 24 | 25 | 26 | 27 | 28 | 29 | 30 |
|
|
學生分享天地-Ivy,追回浪費的青春,勤力練妝,抓緊機會
2013 年 9 月 30 日 星期一 |
今次分享嘅同學仔Ivy係個非常勤力嘅學生，
每逢放假日子都會返Workshop練妝，
所以由最初學化妝到而家都進步咗唔少!
今次應邀同大家分享我既心路歷程，好榮幸啊！
其實平時我都有留意其他同學仔分享，好多都好有共鳴。
希望大家睇得開心，哈哈~
由細到大，我都係無咩目標既人。
中學成績總是比上不足比下有餘。
因為無邊科成績特別突出，
選科都係選一啲沒無咁討厭既科目罷了，
更加唔好講對自己既前途有清晰既目標。
讀上左大學，畢業了，出黎工作左一年半，係中學做文職。
雖然有一班可愛既同事，做得開心。
但年紀愈大亦要為將來打算，搵個有前景既工作，
就開始尋找自己真正有興趣既工作。
我鍾意唱歌，諗過可唔可以唱歌搵食。
試過跟朋友夾歌，但練多幾次後發覺唱歌當娛樂還可以，
但係要我不停咁練同一首歌就真係唔係咁啱我。
我又鐘意欣賞靚衫飾物，諗過可唔可以做時裝設計師，
但時裝設計師除了設計仲要縫紉製衣，我又唔鐘意。
最後就諗到化妝師喇。平時我除左畫眼線，
用睫毛液和遮瑕膏之外，好少化全妝。
心諗先上個基礎班睇下自己有無興趣，
反正學識左就算將來唔幫人化自己亦有得著。
加上我性格活潑，又討厭被束縛，喜歡新奇有創意既事物。
化妝師既工作多姿多彩，可以容許我著自己喜歡既衫，
整自己喜歡既頭。工作時，我可以做番自己。
 
至於點解揀workshop學化妝，其實其他同學都分享過。
免費化妝品提供，無限次預約練妝，交通方便，環境優雅舒適等等…
對我黎講最最最重要既係堂堂都係janice老師親自教導。
學費係貴，但一般既化妝學校收費都唔平，
緊係跟個叻既老師學抵啲啦。
讀大學一個學期都要兩萬幾，
仲要四年先畢到業，大學老師又不會貼身教導。
最緊要知道自己有無興趣，勇往直前，唔好猶疑。
就好像我以前唔會追巴士，但現在我會追喇，
因為機會過了就唔會有，我已經浪費左好多時間，唔想再遲到喇。
記得當初交左學費戶口得番三位數，連化妝掃都要問朋友借錢買，
令我好珍惜每次上堂同練妝既機會。
學校規則嚴，老師亦都嚴。不過嚴師出高徒係真既。
我好鐘意老師既嚴，令我知道自己做得好唔好，仲有邊啲地方要改進。
係老師身上我學到做化妝師既專業。
我發覺老師好重視同尊重model，
因為而家model可能係自己既朋友家人，
將來就係客戶，即係米飯班主。平時上堂老師對我地嚴厲，
但同model講野時就變得好溫柔，提醒我地要時刻以model為先。
老師亦都唔鐘意同學上堂遲到，
練妝約左突然無到，用完啲野唔執好就走。
其實呢啲都係訓練我地第時出黎做野要由細節做好。
出job總唔能夠遲到失場同整亂人啲地方。
所以一個成功既化妝師唔係淨係化靚個妝就夠，服務態度都好緊要。
學左三個月，我覺得最難既係底妝同畫眼線，
花既時間亦係最多。
啱啱開始練妝時我差唔多要三個鐘先搞掂個底妝。
因為未掌握到上妝既手法，又唔知化到點先算ok，
成日搞好耐，坐到model腰骨都痛埋，自己都腰骨斷。
不過練多左快手左，自己信心亦大左。
有model仲鼓勵我話我進步左，好開心∼
畫眼線亦係一大挑戰！平時自己化自己都唔覺得咁難，
原來幫人化要好小心先得架。
一個唔小心篤到model標眼水，真係朋友都無情講，
條眼線立即化開晒，真係喊都無謂，哈哈。
其實我好幸運我既朋友都好信任我支持我，
陪我練妝做我既model，無限感激~
除左化妝，我地仲要做功課搵reference ，
籍此認識多啲唔同既面形眉形等。
而家出街見到啲路人都會不自覺研究下佢地既面形同眉形。
其實自己一直都想做一本scrapbook收集起平時睇雜誌見到既靚造形同靚妝，
私底下都會將啲靚look儲起，
當儲定reference又好得閒欣賞下又好，睇下都開心。
將來我希望可以係化妝師呢行發展。
有左目標，我覺得自己有左方向，人亦踏實左。
我會繼續努力，力求進步。
係呢度想鼓勵埋我啲同班同學仔，
一齊努力，順利畢業！
| |
發表時間：2013-09-30 02:58 PM [ 編輯日誌 ] [ 分享至FACEBOOK ] |
|
