唔知大家鍾唔鍾意買唇膏呢？

而我就非常鍾意買唇膏，
好快就去到上癮嘅地步！

見到一排排嘅唇膏，就好想擁有每隻色！

今日我就好開心，因為可以試唔同牌子嘅唇膏俾大家睇

有 Estee Lauder, Lunasol, Paul & Joe, Pupa, RMK同Shu uemura

秋冬就開始咗喇，

我地就收到Estee Lauder嘅唇膏同唇蜜，

佢地啲顏色都好適合秋冬用架！

Estee Lauder 高清純色炫亮唇膏 ＄220

我就試咗Mirrored Orchid呢隻色，

大家唔好見佢好似好紫，好深咁，

但試上咀，其實係桃紅得黎帶少少紫，

幾靚架，平時出街搽都唔算好誇張！

唇膏本身帶shimmer，睇出嚟有少少令身，

而搽一層都夠哂上色，唔係好乾，
唇紋都唔算好現。

Estee Lauder 高清純色極緻豐盈唇蜜 ＄200

而佢嘅唇蜜，我就試咗隻深紅色ruby glow，

佢非常上色同實色，其實同搽唇膏差唔多，

但個效果就比唇膏glossy，同埋豐滿

呢隻色好適合冬天party、聖誕用，

加埋個smokey eyes就夠哂sexy喇！

平時大家一睇到呢啲色，都會覺得好“哽”！
但其實唔試上咀，都唔知個效果係咁靚架！
所以大家都可以大膽嘗試多啲！

Lunasol Full Glamour Lips

Lunasol嘅eye shadow就試得多，

唔知大家有無用過佢嘅唇膏呢？

而Lunasol今季嘅唇膏就襯返佢個eye shadow,

都係有4隻秋冬色架！

而我就試咗17號色，

類似豆沙色，有少少nude嘅感覺。

唇膏質地好滑好creamy，感覺好潤澤，

因為質地好滑，所以好好搽。
本身無搽潤唇膏，都完全唔覺乾，
好岩乾咀嘅人用！

而且呢隻豆沙色，可以均勻返個唇色，

又有nude咀嘅感覺，冬夏都岩用架！

適合唔同妝容！

之後我on top再加埋lip gloss

 

令個效果再豐盈啲，唇紋都減少好多！

真係唔錯！

Paul & Joe凝潤唇膏 Refill($200) Case($100)

見到咁靚嘅唇膏筒就知係paul & joe啦!

今次新出嘅case，可以自由配撘自己想要嘅唇色

非常之好嘅設計呀！

我就試咗隻橙色俾大家睇，

試上咀，就比唇膏嘅色淺好多，

但可以cover哂個唇色，唇紋都可以遮到

而質地都算潤身，感覺有少少似搽有色嘅潤唇膏。

如果你鍾意呢類顏色，但又怕太sharp，
大家都可以試下paul & joe，

出嚟效果好自然架！

 

RMK Irresistible Lips 

自己本身都未試過rmk嘅唇膏，

試完都幾驚喜，原來rmk除咗底妝外
lipstick都唔錯！

呢款唇膏好好搽，都算幼滑

亦都可以均勻唇色，

支唇膏無影相咁深色，係淺好多嘅，

其實佢係珊瑚粉紅色，

令個咀好粉嫩，好靚夠哂低調

因為佢夠滋潤，搽上去好貼，

就好似自己個唇色咁！
而且唔會笠住個咀，
平時返工化簡單妝容，
襯呢款唇膏就岩哂喇！

Shu uemura 個性紅唇系列 ＄210

Shu uemura全新嘅紅唇系列，
有6種紅色嘅色調

而且呢個系列有一個獨特嘅雙重混合色素粒子技術，

令唇膏更加鮮明同豐富，
而且有鎖水滋潤效果添！

我試咗dolly red lucid，

佢係紅中帶粉嘅色。
大家睇支唇膏，可能會覺得好鮮色，

但質地係好水潤，所以係好透薄，

而且完全無感覺到乾！冬天用就岩哂喇！

效果出嚟好令身，好似有搽lip gloss嘅效果！

雖然係咁但唔會有笠住個咀架！

水潤得嚟亦都好上色，又易搽

 

如果你本身唇唔夠色，想突顯返唇色

要自然水潤效果就可以選擇呢隻顏色！
返工出街都岩架！

Pupa 絲絨啞緻潤澤唇膏 ＄148

呢款唇膏係matte質地，同其他試嘅唇膏唔同

佢有8隻色俾大家揀，

我就試咗個sharp桃紅色！

好多人都好怕用matte質地唇膏，

因為驚會好乾會搽到一撻撻，

雖然呢支係matte質地，但佢都好易搽，

唔會有搽得唔均勻嘅情況。

不過搽實色咀時，大家最好就用支唇筆勾返個唇型，

咁個唇先夠靚架！

如果鍾意有啞光效果嘅唇膏，就可以試下喇！

另外，近期大家都好興化韓妝，

而且韓妝好多時都用呢啲咁螢光嘅顏色，

去化咬唇妝，漸變色咀咁。

所以大家都鍾意呢啲妝容，

都可以買呢隻唇膏架！

其實唇膏對女仔嚟講都好重要架，

平時只要搽少少唇膏，

睇落去個人都會精神好多，面色都紅潤啲架！