正所謂,平有平用貴有貴用,啱啱出嚟做化妝師,
一定冇Janice咁多sponsor, 我同Karen唯有周圍搜尋邊度有平靚正嘅護膚品,
今次我地搵到4款$100內既mask：
Nature Republic 蘆薈mask $32 (Colourmix有售)
之前有朋友去韓國買過Nature Republic
嘅sleeping mask比我，覺得都幾好，
但以我所知香港冇專門店，
所以有次去澳門見到有專門店就入咗去逛逛，
就比我見到呢個蘆薈mask,嗰陣係夏天，
超熱超曬，諗住返到酒店可以敷下都幾好喎
，仲寫住特價添，$69實在係好合理，
點知返到香港，竟然見到Colourmix有得賣，
仲要特價平一半！！即時晴天霹靂！
原來自己買貴咗仲以為已經好平，激死我！
雖然只係幾十蚊，但買貴咗就係覺得唔抵。。。
呢次事件教訓我要多啲周圍行，咁先唔會買貴嘢。
講番個mask先，其實我幾鍾意用嘅，
因為一打開蓋已經有陣好清新嘅味道，
好refreshing,敷完感覺好清爽，好啱油性皮膚嘅朋友，
蘆薈mask有舒緩作用，雖然我係乾皮膚人士，
夏天時候會敷得密啲，而家有時我都會敷下，
而且厚敷都唔會肉痛！仲可以當sleeping mask用架!
innisfree mask $10/ 塊 (innisfree有售)
第一次用都係朋友喺韓國買返嚟嘅，
而家進駐咗香港就好方便喇，
雖然價錢比韓國貴，但係都算fair，
而且佢有好多選擇，逐塊買又得，真係唔錯！
相入面嘅全部都係保濕系列，我嘅皮膚成日都好dry，
好需要補水。之前都買過innisfree滋潤度較高嘅mask，
好似蜂皇漿，金奇異果咁，但係我就覺得保濕系列，
例如bamboo滋潤得嚟感覺水啲，舒服啲。
另外一個推介原因就係精華嘅份量好多，
皮膚就算幾乾，敷完10分鐘度都仲有好多精華，
我就梗係唔會嘥，搽埋手腳，涼涼地好舒服
連眼嘅位置都可以敷埋，
慳埋eye mask嘅錢呀! 的確好划算!
而家入冬天氣咁乾燥，如果大家都好似我咁缺水嘅都不妨試試！
森田藥粧蝸牛修護原液面膜 $59／10塊（萬寧有售）
內含酵母精華（柔嫩，緊緻，保濕肌膚）,
蝸牛萃取精華（修復，促進纖維母細胞的合成新生）,
有機夢蝶草（有效減少肌膚玻尿酸流失，水潤保濕、抗氧化，捕捉自由基）
同埋有機神奇草（有舒緩、柔敏、修護功效）。
 
依款面膜內含好多精華，打開包裝,內裡仲見到好多精華,精華比較水狀,好滋潤，
好適合秋冬咁乾燥時候用，包裝上建議敷約10-15分鐘，
但仲淨好多精華，我通常會敷20-30分鐘（視乎皮膚狀況而定），
我會敷埋條頸，唔好嘥咗啲精華呀！
敷完後，連乾紋都冇咁明顯呀！
而且好平，平均唔駛$6塊，成日敷都唔會肉赤！
Sexy Look 極美肌深層亮白純棉黑面膜 $ 65 ／5塊（萬寧有售）
平時見紙面膜係白色就見得多啦，
但依款紙面膜就係黑色就第一次見，
佢用咗最新科技，將活性炭織入純棉布膜度，
可以吸出多餘油脂、污垢，深層清潔毛孔，
去除多餘嘅角筫，以黑吸黑，改善肌膚暗啞問題，
透出潔淨而又亮白光澤嘅肌膚。
佢主要用途係提供肌膚深層保濕力，提升肌膚透亮度。
主成分有；膠原蛋白（魚）、三胜肰、黑珍珠萃取、
蠟菊萃取液、雷公根（積雪草）萃取精華、黑蜂花蜜、黑曜石萃取、傅明酸。
大約敷10﹣15分鐘，敷完後，不用過水,
但我覺得深層清潔毛孔效果就唔明顯啦,用返洗臉或其他深層清潔好過,
但皮膚就冇咁暗啞，亮白咗少少。
一個禮拜敷一次左右就足夠！
| 
