雖然聖誕節仲有成個幾兩個月先到，

但各個彩妝品牌已經急不及待咁推出佢地嘅聖誕系列，

件件產品都靚到不得了，真係睇到眼都花埋！

今次就想同大家一齊先睹法國嬌蘭嘅聖誕產品，

今年佢地用咗「Crazy Paris」作為系列主題，

顏色嬌艷奪目，令人聯想到紅磨坊嗰種巴黎獨有嘅狂熱色彩，

今個聖誕想瘋狂咁徹夜狂歡，呢個系列就啱哂大家喇！

首先一定要同大家介紹嘅焦點產品係呢款

CRAZY PARIS Eye Palette Neon Look 巴黎夜狂熱眼妝組合 $660。

右邊打橫嘅係四款顏色突出嘅Eye Shadow，

由上至下分別為紅棕色、淺啡色、米白色同桃紅色，

乾用濕用皆可，除咗個別使用，亦都可以混合塗抹。

而左邊打直嘅係兩排啞光眼線粉，同樣可以乾濕兩用。

今次我地就用呢個Eye Palette同大家示範咗兩個聖誕妝容，

一日一夜，一嬌媚一狂野，大家不妨按喜好做個參考！

Day Look – 嬌媚巴黎Lady – 粉紅Tone

1. 先喺眉山位置掃上米白色嘅眼影作為Highlight。

2. 眼蓋中心就掃上桃紅色眼影作為主色。

3. 跟住喺眼頭加添一啲帶閃嘅淺啡色眼影。

4. 再喺下眼線嘅眼尾位加一啲淺啡眼影，令輪廓更突出

5. 最後畫上黑色眼線，可選擇乾上，令整體感覺更通透自然。

6. 完成了！一個自然嬌柔的聖誕日妝。

Night Look – 狂野巴黎女郎 – 啡Tone

1. 先喺眉山位置掃上淺啡色眼影。

2. 眼蓋中心就掃上紅棕色眼影作為主色。

3. 跟住喺眼窩位添上黑色眼線粉，再輕輕Blend開

製造性感迷人嘅Smoky Eyes妝效。

4. 下眼頭就掃上桃紅色眼影，令成個妝嘅色彩更豐富。

5. 然後喺眼尾位置添上灰色眼線粉。

6. 最後再畫一條實一實嘅黑色Liquid Eyeline，

成個眼妝係俾人一種性感狂野嘅感覺。

跟住就要同大家介紹一下兩款聖誕限量嘅唇膏啦啦！

第一款係ROUGE G DE GUERLAIN寶石唇膏嘅

聖誕限量色號863 PROVOCATIVE $460。

呢款唇膏嘅特色在於顏色非常實，

搽一層已經可以得到非常堅固嘅妝效，

呢隻限量顏色仲好Sharp，用黎化紅唇妝簡直一流。

再加上呢款唇膏獨有嘅附鏡唇膏盒造型，

最適合喺聖誕除夕呢啲日子帶出街補妝呢！

而另一款焦點唇膏產品就係

ROUGE AUTOMATIQUE水凝亮彩唇膏嘅

聖誕限量新色660 ILLUSION $280。

驟眼睇會以為呢隻紫紅色好蝦人搽，

其實呢款唇膏色澤好透亮，薄薄搽一層，

出嚟嘅會係帶啲啲閃嘅梅紅色，

一啲都唔難Carry，仲好適合用黎打造迷人嘅X’mas Look添！

值得一提嘅係呢款唇膏質地好水潤，又好易推開，

啱哂喺冬天乾燥日子使用！

到咗冬天，各品牌都出唔同嘅粉底，

一般都會比較滋潤啲，

如果易出油可能又未必咁啱，

但有時未必本身係油性皮膚，

有可能係太乾所以出油，

咁就要揀支潤得嚟又keep得耐嘅粉底喇

TENUE DE PERFECTION親肌修顏粉底液 $455

三種揮發性油份，令粉底更柔潤，

遮瑕、控油都好出色，

其中嘅Timeproof長效複合物有助固定粉底，

令妝容更long-lasting,

外國品牌多數有分粉紅tone同黃tone，

亞洲人用黃tone就會自然啲，

我自己就好鍾意用嬌籣嘅粉底，

易推，遮瑕度好又滋潤，讚!

左:幻彩流星夜狂熱亮澤彩妝粉餅 $580

中:幻彩流星夜狂熱限量彩妝粉 $440

右:LES VOILETTES輕薄蜜粉粉餅 $420

先由左面開始，呢個粉餅帶粉色tone,

用個掃全面掃一掃，即時紅潤啲，

面青青嘅朋友啱晒，用完面色會好啲，

中間就係好得意嘅波波彩妝粉，

帶淡粉紅、淡紫、藍色呢啲較淺嘅color tone,

比較適合皮膚白嘅朋友，

另一特別之處就係佢會比較 “令”身，

如果皮膚乾，欠缺光澤感就最啱喇!

最後右面係pressed powder,

如果本身有乾紋，驚上得多碎粉好厚唔自然，

可以試試呢個蜜粉餅，

滋潤性高，搽多咗都唔會覺得乾，

仲有珠光粒子令皮膚睇起嚟滑啲添!

面上要有光澤，頭髮同body一樣要閃令令~

夜狂熱小黑裙香體閃粉 $650

每年都會出嘅香體閃粉，我都有集齊架，

今次限量版新裝有小黑裙加熒光粉紅泡泡噴球，

多咗一份神秘感同性感，

有Guerlinade,甜杏、保加利亞玫瑰等散發嘅淡香味，

而且有少少“令”身，噴一噴頭髮同Body，魅力指數即時UP!

CRAZY MANICURE夜狂熱甲油 $190

Party Girl當然要緊貼美甲潮流，

右面好似夜空紫藍嘅顏色

加上左面帶藍色調嘅top coat做出螢光效果，

喺燈光昏暗嘅Party都見到你啦~