踏入秋冬，受到靜電同乾燥天氣影響，
好多女仔都會遇到一個煩惱：
朝早起身啲頭髮梳極都梳唔順，
而且仲冒出好多亂七八糟嘅毛毛，
 令成個頭睇上去又乾罕又凌亂，認真肉酸！
今次就想同大家介紹幾款專為針對毛燥髮質而設嘅產品，
為大家嘅頭髮補充營養同水分，撫平惱人嘅Frizz，
令大家每朝出門前唔使又洗頭又吹頭咁麻煩，
都可以帶住一頭柔順秀髮出門！

首先要介紹嘅係kms california嘅皇牌系列TAMEFRIZZ，
呢個系列專門為天生鬆散毛燥嘅髮質而設，
配方入面加入咗獨有嘅「De-Frizz技術」，
可以調整髮絲嘅內外結構，唔單止順服頭髮表層，
更加可以修復髮絲受損嘅底層，徹底改善毛燥問題。
系列除咗洗頭水、護髮素之外，
仲包含頭髮用嘅Cream、Lotion同髮尾油，
全方位撫平毛燥髮絲。

 其中呢款TAMEFRIZZ Smoothing Lotion $190 / 150ml，
專為較幼細易斷嘅毛燥髮質而設，
蘊含巴西樹果精華同洋槐樹精華，
可以為髮絲提供豐富維他命E，保濕兼順服頭髮。

 使用時，只需擠出呢個份量喺掌心，
然後利用雙手將乳液均勻搓開，
再塗抹至半濕嘅頭髮之上，然後用風筒吹乾就得咖喇！
如果想再快手啲，亦可選擇直接塗抹喺乾髮之上，
雖然乾用嘅效果未必有濕用咁持久，但勝在夠方便，
可以即時撫平啲毛毛，亦都可以快速解決髮尾開叉嘅問題。
留意髮頂位置毋須塗抹太多，只集中搽喺髮中至髮尾即可，
以免令頭頂顯得油立立呢。

試用喺乾嘅髮尾上面，可以見到髮絲周邊嘅Frizz貼服咗，
而頭髮嘅紋理亦明顯地整齊咗，變返一條條而唔係亂咁叉，
同埋從表面睇，頭髮嘅濕潤度同光澤度都有改善，
整體而言係無咁雜亂，髮質係靚咗。

 跟住就想同大家介紹MATRIX呢款
Total results Moisture Cure 2-Phase Treatment
瞬間保濕修護噴霧 $99 / 150ml。
從透明樽身可以睇到，噴霧包含兩層液體，
上層乳白色嘅係杏仁油，有助滋潤髮絲，
令頭髮更加順滑易梳，同埋可以加添髮絲亮澤；
而下層藍色嘅就係甘油，有保濕作用，
為髮絲持久補充水分，令頭髮摸起上嚟都柔軟啲。
呢款產品同樣可以用喺乾髮或濕髮之上，毋須沖洗，
使用前先搖勻兩層液體，再噴喺髮中至髮尾就可以，
甚至可以洗頭前使用，令洗頭期間頭髮唔會打「Kick」。
而如果想發揮最佳效果，就係洗頭後噴喺濕髮之上，
再用風筒吹乾，咁之後24小時頭髮都會柔順無毛燥咖！

 最後要同大家介紹嘅就係MA CHERIE新出嘅
Perfect Shower Moist 保濕護髮噴霧 $68 / 250ml。
呢款產品配方加入咗「Moist Touch」成分，
利用獨特嘅「AQ納米乳化技術」，為髮絲補充水分，
撫平因乾罕天氣或者睡姿導致嘅外翹髮絲同埋毛毛，
最重要當然又係毋須沖洗，只須噴喺唔聽話嘅濕髮之上，
然後將頭髮梳返整齊，再等待風乾或者用風筒吹乾就得！