我哋成日都會試好多唔同品牌嘅化妝品，
當中有貴價亦都有平價嘅，
今篇就同大家推介又平又好用嘅產品啦！

innisfree Creamy Tint Lipstick： 約＄90 （購自韓國）

呢兩年都興好sharp、好實嘅唇膏，
但唔算好多牌子會出，而且自己想搵一啲matte質地唇膏，
點知就俾我遇到呢支唇膏，佢完全滿足哂我嘅要求，
你見我買咗咁多支就知道，我有幾鍾意佢喇！

雖然佢係matte質地，但佢一啲都唔乾，
只需要用薄薄潤唇膏打底就可以。
而且佢係非常上色，圖下只係搽一層就足夠，
仲要好Long Lasting添！
我就係韓國旅行時買，價錢大概90蚊有找，
而係香港買就貴少少，百幾蚊到，
所以去韓國個陣，大家可以去睇下。

Media 蘋果肌蜜粉 ：$75 (購自SaSa)

當初喺開架見到media呢個牌子覺得好陌生，
睇真啲原來係Kanebo旗下嘅，而且價錢都幾平，所以就試下啦！
混合咗白色、紫色、藍色、粉色嘅蜜粉餅，
有保濕成份海洋性骨膠原，真珠萃取精華，
就咁睇好似好白，搽咗上面就會變透明，
而且有好細微嘅閃粉粒，效果好自然，
令皮膚睇上去有光澤啲。
雖然case要另外配，但其實都只係＄25，
淨係買refill隨盒都有附送粉撲都唔錯啦！
好多大品牌都會出類似嘅蜜粉餅，但係價錢最少都要幾百蚊，
所以對比之下呢個真係好抵用架！

塗咗一層上手，已經好有光澤感啦！
呢盒粉餅有2種用法㗎！
除咗用嚟做粉餅之外仲可以用嚟當光影添！
粉餅用法：用碎粉掃，輕輕掃上面，
皮膚即時好有光澤，加上用掃上令皮膚睇落更滑。
光影用法：用光影掃輕輕掃上T字位，
出嚟效果好自然，
好似溶入肌膚咁呀！

洗撲液：$12 (購自12蚊店)

平時我哋成日介紹化妝品，
今次就介紹呢支洗撲液啦!
會化妝嘅女士幾乎每日都會用濕粉撲上粉,
咁貼皮膚嘅用品緊係要做足清潔步驟啦!
粉撲通常一個星期就要洗一次,
要搵一隻洗得又乾淨又抵用嘅洗撲液都唔易嫁!

用法:係污糟的粉撲上擠一滴,濕少量水然後揸出粉底液,沖水揸至乾淨即可!

Shiseido 眉筆： $22 (購自卓悅)
Kate 眉膏：$65 (購自SaSa)

呢個眉部孖寶我真係用咗好多支，
不斷回購再回購，
一嚟真係好用，二嚟真係好平好抵用。
兩樣加埋都唔過$100！
我本身頭髮染咗淺啡色，
但係條眉就好深色！
所以我都試過用不同嘅眉部產品，
最後都係呢2枝最match到我嘅頭髮顏色！

眉筆好易畫出色，
又Keep得耐，
加上佢細細支，方便放係化妝袋。
＄22呢個價錢都好抵啦！
（係日本買更平呀，約10幾蚊到咋）
至於眉膏，
市面上有好多唔同品牌嘅眉膏，
但好多都係令身嘅，
（其實一開始Kate出眉膏只係得2隻色，
2隻都係令身，同埋比較深色。）
直到佢出咗呢隻淺嘅matte色，
我就一直用到而家啦！

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup