大家好!我係Joan~
唔經唔覺已經畢左業四個月,
上一次都分享過為左爭取時間我係同一時間完成大學學位同埋學化妝!
係呢幾個月自己都試過接下job,
而上個月開始都加入左workshop幫手,
不時都可以跟Janice出下job!
今次就等我分享下出Job嘅經歷啦!

自己接Job同跟Janice出Job都有一個共通點,
就係要快快快同快!
當然快得黎都要靚同正啦!
首先講下自己接嘅Job先啦!
好想同大家分享一個晚宴Job同新娘飲宴Job

呢個太太晚宴妝係我畢業後第一個接嘅化妝Job,
果日好突然,係朋友介紹即日接嘅Job,
諗返都覺得自己大膽,
接呢個Job連埋化妝完妝都冇半日,
完全冇諗過會唔會帶漏野,個客想化咩妝等等!
好彩太太最後好滿意個妝,
佢另外兩個朋友都即場要求幫佢化埋個簡單妝容!

令外一個新娘飲宴妝其實係我從加拿大返黎嘅表哥表嫂擺酒,
知道我學完化妝特登唔搵MUA留返俾我化,
再一次多謝佢地對我嘅信任,
由於佢地係外國返黎有好多應酬,
臨時遲左一個鐘頭返酒店,而我只係淨返一個鐘頭化妝set頭!
時間非常緊湊,好彩到最後都趕得切化哂成個妝,佢地都好滿意!

經過幾次經驗先知一手一腳由底妝到完妝真係一啲都唔容易,
當你背負住一個Job係身,其實壓力都幾大,
因為客人將佢重要嘅一日交俾你,你都會想做到最好嫁!
咁分享完自己接嘅Job,
之後就分享跟Janice出outjob啦!
可能你地會話:你自己接Job就大壓力姐,
咁跟outjob做助手唔會啦呱!
你地又錯啦!老實講,其實係一樣甚至更大壓力嫁!
大家都知道Janice化妝技巧真係大師級,
搵得Janice化嘅都係大Job,要快靚準之餘仲唔可以出錯,
一做錯野影響嘅唔係自己聲譽而係Janice同Workshop,咪話唔緊張!

言歸正傳,
我都跟Janice出過幾次Job,
咁今次就分享代表Workshop出去化Halloween妝同埋最近一次出去化雜誌大頭妝做助手

Halloween果次係義工形式幫小朋友畫鬼臉,
好次好輕鬆咁,但其實我地team係六個鐘內化左200幾個小朋友,
真係連去廁所嘅時間都冇!
但係好好玩嘅!果日連大朋友都玩得好盡興嫁!

而雜誌大頭妝就真係比較大壓力啦!
雖然我地只係做助手幫手抹下妝轉下妝,
抹妝嘅時候先發覺原來都要好講究~

有啲妝容會用油彩幫model填滿眼蓋,就連眉毛位置都染滿顏色,
抹嘅時候要抹走顏色又唔可以抹走底妝都幾難嫁!
由於懶左冇咩練妝連最基本落妝都生疏埋,
真係抵話!轉妝最後都係要Janice親自出手!
Janice一出手二三下已經抹返乾淨之餘仲補返靚個底可以繼續轉造型啦!

大家睇到咁多個造型,其實都係當日先知道主題即場設計~
原來出黎做Job好多時都唔會預先知道化咩妝,妝嘅主題係啲咩!
所以除左基本功之外~Janice成日叫我地睇多啲留意多啲係無錯嫁!
大家真係要儲定多啲"貨"啊!
大家都唔想有朝一日自己接Job人地叫你諗個造型你企左係度唔知點化嫁~

咁多個造型當中,我最鐘意呢個粉紅妝容~
大家望落去個妝係咪好出色呢!
單單眼妝嘅部分已經運用左不同嘅粉紅打造層次感,
望落去出色之餘又唔會死實實!
其實Janice都係用返Workshop嘅Product出Job,
只要個Base打得好,記住平時上堂成日講嘅基本技巧"壓色",
平時嘅Product都可以運用係雜誌大頭妝容上嫁!

出Job除左係化妝方面要幫手之外,其實係Team Work!
可能你見到Model擺Pose要輔助工具你又要去幫手,試燈您又可能要做下Model!
你可能會話呢啲唔係你工作範圍!但加快左成個流程,對成team都有好處啦!
所以話做野真係唔好怕付出~你幫到手就一定要幫!
人地肯比機會你學多樣野,對自已都有好處啦!

如果唔係跟住Janice出Job,我都唔知一幅雜誌相背後要做咁多野嫁!

連Model指甲呢啲細節都要留意!真係學到唔少野啊!
所以大家同學仔想做到快靚正,
真係要付出時間,勤力練習,唔好怕付出怕辛苦,
因為一生疏左就要從頭開始嫁啦!
今次分享到呢到~下次再同大家分享啦!

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup