尋日就有Irene示範咗3個品牌嘅春裝眼影妝，
今日就等我Jellia同大家分享另外3個品牌嘅春夏眼影啦，
而家就示範下點用佢哋嘅眼影，
嚟化呢3個不同感覺嘅春妝啦！

第一個就係我一直都好鍾意嘅眼影品牌 ﹣ Lunasol 砂景淨化系列

今次呢個系列係用砂景嚟做主題，
眼影顏色都係好自然，
塗上眼效果係好柔和。

而家就化個柔和效果嘅眼妝先：

Step 1: 首先用1號眼影掃上整眉骨位做highlight
Step 2: 用3號眼影掃係眼窩位置
Step 3: 用4號眼影掃係雙眼皮位置上
Step 4: 同樣用4號眼影掃係下眼尾位置
Step 5: 用1號眼影掃係眼頭位置
Step 6: 用眼線筆畫眼線

成個Total Look：

今次佢嘅眼影同過往有啲唔同，
過往色調都係由淺至深色，
今次呢個系列顏色就係偏自然為主，
淡淡嘅顏色加上小小閃粉，
就算係新手都好易上手！

下面個4款就係 Laneige Pure Radiant Shadow $260/6g

眼影含有珍珠末成份，不單止有潤膚嘅作用，
仲令到佢嘅質地好滑添！
閃眼影部份只要輕輕一掃就已經好閃，啲色好出呀！
啱晒鍾意bling bling嘅姐妹們！

係時候用示範一個bling bling眼妝比大家睇下先∼

Step 1: 用2號眼影掃係眼窩及眉骨位做hightlight
Step 2: 用4號眼影掃係雙眼皮位
Step 3: 用1號眼影掃係眼窩位置
Step 4: 用4號眼影係下眼尾2/3位置
Step 5: 用3號眼影畫下眼頭位
Step 6: 畫上上眼線再塗上睫毛液就完成

成個Total Look：

呢盒眼影真係好百搭，
佢一盒裡面有2隻好閃嘅色又有2隻matte色，
當日妝用：可以用2號色打底，用4號色畫眼線，出嚟效果好自然！
當晚妝用：可以加上1號色塗係上眼蓋位置，
眼妝即係bling bling咗，如果想化個楚楚可憐嘅韓妝，
又點少得整個卧蠶呢？
可以用番1號色或3號色打亮眼頭就輕易做到啦！

日式，韓式嘅眼影都試過啦！
個人認為Lunasol個盒嘅色會常用啲，失手機會幾乎係零！
介紹完日系嘅Lunasol，韓系嘅Laneige
而家介紹埋歐美品牌Clinique嘅眼影啦！

Clinique All About Shadow $275/4.8g
初初一打開盒眼影嚟睇，其實覺得無咩特別，
以為都係一盒matte色眼影，
點知一試上手，質地好滑之餘仲有珍珠光澤添，
啱晒眼部輪廓唔明顯嘅我！

打開個盒就見到佢有個圖教我咩色塗係咩位置，
有時新手見到一盒幾隻顏色嘅眼影，真係唔知點塗先靚，
有咗呢個教學圖，真係易上手啲∼

頭先2個妝都係比較粉色，
所以今次我就試下個藍色眼影啦！

Step 1: 用1號眼影掃係眼窩及眉骨位做hightlight
Step 2: 用3號眼影掃係雙眼皮位
Step 3: 用2號眼影掃係眼窩位置
Step 4: 用4號眼影係上下眼尾2/3位置
Step 5: 用3號眼影畫下眼頭位
Step 6: 畫上上眼線再塗上睫毛液就完成

成個Total Look：

唔知大家會唔會都同我一樣，有時買咗盒4色眼影番嚟，
其實用嚟用去都係個2色色，頂盡都係3隻色，
總係淨番另一隻色唔知點用！
歐美品牌嘅化妝品比我印象係實用為主，我覺得真係無錯！
今次嘅Clinique就做完全發揮到呢個實用效果啦！
佢一盒4隻色，真係4隻色都用到！
佢仲好細心教埋你點用添！真係唔錯！

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup