相信好多女仔同我一樣好鍾意煲劇，
無可否認煲劇係需要好多時間，
但係其實煲劇除咗睇劇情、睇偶像之餘，
都有好多嘢睇架，
可能係職業病，又可能統綷興趣，
睇劇一定會留意埋啲造型，
例如妝、頭、服裝、飾物，
好似今次介紹呢套劇裡面嘅造型就絕對係好好嘅reference喇！
前排星星熱潮，千頌伊嘅不同造型引起大家嘅高度關注，
無論係衫，Accessories，妝物都大受歡迎。
本身麻麻地古裝劇，但不約而同地有幾個朋友都話好睇，
好奇之下就睇咗呢套古裝劇《奇皇后》，
估唔到連古裝劇都可以咁有驚喜喎，
裡面嘅戲服、飾物係好∼華麗∼好∼靚，
做research之下發現原來全劇戲服用咗約1500萬won，
都算落重本架！唔怪之得咁靚啦！
睇過呢套劇嘅朋友一定會有同感，
未睇嘅朋友就睇下我嘅分享啦！

劇情就唔多提啦，
主要係講女主角河智苑為咗生存同報仇，
細個開始就要女扮男裝，
經歷咗好多嘢之後決定入宮進行復仇計劃，
由宮女做到皇后嘅故仔。
奇皇后（河智苑）由最初女扮男裝、
到入宮做宮女、才人、貴妃到皇后，
髮型，妝容，服飾都有好大嘅轉變，
雖然係古裝劇，但係一啲都唔“娘”架！

呢個係最初入宮做才人時候嘅造型，
半扎嘅髮型相對較溫柔可愛，
衫都係粉色，淡色為主。
睇上去冇乜殺傷力，柔弱一啲。

做咗貴妃之後就開始紮起all back，
盤起嘅all back頭真係好難carry,
但係皇后嘅標準鵝蛋面型完全無問題，
亦突出咗佢威嚴嘅一面。

講起韓妝，點可以唔留意眉形同唇妝。
眉形真係好影響比人嘅感覺，
睇佢最初做才人同最後結局落泊嘅樣，
條眉係彎同平直啲，淡色啲，
而唇妝就係偏淡同自然，
睇上去楚楚可憐，弱勢好多。

比起做皇后嘅時候拉長咗嘅上揚眉形，
差別好大呢！
完全表現到喺敵人面前要tough嘅一面呀！

韓式妝容一向比人感覺好clean、好有神，
河智苑嘅妝容都唔例外。
最初扮男仔膚色係冇咁白淨嘅，
只係畫少少粗嘅眉。

之後做番女仔做宮女嘅妝就好nude，

效果係化咗好似冇化咁，
細心睇就見到係畫咗內眼線喇。

就算之後皇后嘅妝都只係加咗啡tone眼影，
拉長少少上眼線同加埋好幼嘅下內眼線，
唇就多數用鮮紅、桃紅之類sharp色。
已經係最多架喇！

大家睇咗咁多相，有冇留意到皇后嘅衣飾都係好特別呢！

上面幾個皇后look嘅飾物令我諗起新娘子嘅金器，
尤其呢對耳環，我覺得都幾靚，
結婚有咁嘅“行頭”都好犀利，哈哈！

上面呢兩對耳環算casual架喇，
一樣係好別緻架！

大家睇完會唔會有衝動想睇呢？
個人認為呢套劇好有追看性，
如果你係一開始睇就停唔到嘅煲劇迷，
就要小心喇！
下次有機會再同大家share其他劇啦！

 如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup