今次我地分別搵咗四位同事試用四款價錢相宜嘅產品，
四位同事屬不同膚質，
所以試用後亦可能有唔同嘅效果同感覺架，
有時未必係個產品唔好用，只係唔適合本身嘅皮膚。
試用報告只供參考，
大家應根據自己嘅膚質同需要去選擇呀！

innisfree呢兩隻cream都係100%鮮榨綠茶原液製造，
含百分百有機綠茶原液，
綠茶籽含兒茶素，有助排除肌膚細胞中嘅毒素同廢物，
刺激水循環及新陳代謝，
高效抗氧，抵抗自由基能力比維他命C高出100倍。
綠茶籽所含嘅兒茶素較一般綠茶葉高3倍架。
專利Seed Bio Technology種籽生物科技能將綠茶籽分解成10微米超微小分子，
再溶化於淨水中，研製成綠茶純水，代替一般產品配方所用嘅清水。
每粒綠茶籽粒子由水溶性啫喱包住，
確保綠茶籽嘅有效修護成分可以滲晒入皮膚，
提供長時間保濕及有高抗氧功效。
產品不含色素、乙醇、防腐劑、
礦物油、動物性原料及苯甲酮。

先試試innisfree The Green Tea Seed Cream∼

Irene: 混合性偏乾
佢質地係Gel狀，一打開有淡淡綠茶味，
上面後感覺涼涼地，都幾舒服。
我就當佢係Day Cream咁用，
佢好容易吸收，好易推，
非常清爽，所以好岩夏天用。
但如果冬天或夜晚開冷氣用，
我自己就又未必夠潤喇!

Karen: 乾性
味道幾清新，感覺幾舒服，
Gel cream質地推開一啲都唔笠，
清爽得嚟唔覺得乾，
早上搽完出街就啱啱好，
如果返office坐冷氣地方就唔夠潤喇。

Jellia: 混合性T字位易出油
呢個cream係gel狀質地，
味道好香，
搽咗上面好易推開，又好爽身，
好啱夏天用！
由於我皮膚唔算乾，
所以我就覺得呢隻cream嘅保濕度都夠。

Una: 油性
搽上面感覺質地水潤,
香味好清新。
不過對於油性皮膚嘅我嚟講唔夠清爽。
或者天氣凍d先會岩我用。

innisfree The Green Tea Seed Deep Cream
好似形成保護膜咁鎖住肌膚水分。

Irene: 混合性偏乾
呢一款質地比起頭先厚身好多，
有啲似balm狀，佢就會難推啲，
上面後要按多一陣就會吸收哂，
而且都係有少少綠茶味。
雖然佢比較厚身，但我自己又唔覺得好笠，
可能因為開冷氣訓，反而覺得岩岩好，
第二朝，塊面無出過油，
代表呢個cream夠潤，唔會乾到出油。

Karen: 乾性
好杰身，比較難推，
質地好潤，塗勻後都有少少黏笠，
夜晚開冷氣第二朝起身都冇覺得乾。
我覺得滋潤度唔錯，適合夜晚用，
搽得潤少少第二朝皮膚就唔會繃緊。

Jellia: 混合性T字位易出油
呢款deep cream味道好香，質地厚身啲，
推第一、二下覺得好似好笠咁，
但推多幾下皮膚吸收咗之後就覺得都OK，
不過我T字位易出油，所以會避開T字位唔搽，
我會選擇夜晚先用佢，
因為如果當Day Cream嚟用，我就覺得滋潤咗啲喇！

Una: 油性
味道同之前果款一樣好清新,
質地好杰,
但推開時感覺好柔滑。
不過我油性皮膚平時出油多, 油份已經好足夠,
所以呢款deep cream 對於我嚟講似乎太潤了。

Holika Holika Anti-Wrinkle Make-up Starter

一次性嘅潔膚護膚品，
紅色波點一面含天然AHA Seaweed萃取，
可以溫和咁抹走角質層，
之後再用另一面有Collagen,透明質酸等成分抹面，
可做到滋潤保濕效果，
代替其他skincare步驟直接上妝。
佢可以代替skincare 同 makeup base,
對於化妝師嚟講好方便,
宜家就等我地四位同事試下佢點啦!

Irene: 混合性偏乾
打開嘅時候，裡面都有好多精華，
感覺就好似平時mask咁。
用有粒粒凸起個邊去角質，抺嘅時候感覺都幾舒服，
再用另一邊抺，之後再用手輕拍，
佢都好快就吸收哂，感覺都算滋潤。

之後直接上粉底，粉底都算貼面，
鼻翼位置都唔會cake粉問題。
夏天返工想極速上妝，
用呢一塊棉就可以代替skincare。

Karen: 乾性
用波點果邊可以好溫和咁去角質，感覺幾舒服，
用另一面抹埋面，感覺都幾滋潤，
精華份量抹晒全面都足夠有餘。
之後上妝效果都唔錯，幾貼服。
一塊做到toner+skincare效果都幾方便，
出trip唔想帶咁多skincare就啱晒。

上粉底都幾貼服，唔會cake粉甩皮。

Jellia: 混合性T字位易出油
一打開就用咗紅色點點個邊先輕輕抹下面，
幫皮膚去角質，之後再用另一邊抹面，
抹完之後用手輕輕拍面，
等啲精華易啲吸收，
因為我好拍笠，
所以拍完面之後我會用紙巾輕輕印走多咗嘅精華，
先再上粉底，
粉底都好貼面，如果有時趕時間出門口，
真係可以試下用呢個，
方便又快捷，
另外，一包裡面精華都好多，
所以包裝袋入面淨返嘅精華，
我會用嚟搽頸部手部。

Una: 中性偏油
搽上面感覺好似拎住塊MASK搽面咁,
質地軟, 抹面都幾舒服嘅!
但我覺得精華似乎太多,
抹完面都要再用化妝棉抹走部份精華!

我皮膚偏油用佢又唔會覺得用完出油多咗同快咗,
出油方面同平時差唔多。

但係用佢我可以縮減搽BASE同Lotion 呢幾個步驟真係方便d。
用完佢再上妝效果都唔差,
粉好貼面, 無浮粉!

Kiss Me 濃黑柔滑眼線液

含透明質酸保濕成分及
速乾、防水、防汗及防油脂配方，效果持久，
用溫水亦可卸走。

A: 測試粗幼效果, 容易控制粗幼度
B: 用清水都可以抹清大部份眼線, 防水能力一般。
C: 只用卸妝水就可以輕易抹走所有眼線。

Irene:

首先佢啲顏色夠黑同實，都唔錯，
但支筆頭係棉頭，畫嘅時候好易就畫得好粗，
要控制得好好先畫到條幼眼線，
而且個頭好硬，畫嘅時候會好唔舒服，
特別係填睫毛之間嘅空隙，感覺會好吉，
我就唔建議大家買喇！

Karen:

筆頭好硬，畫嘅時候好吉好唔舒服，
覺得好‘鞋’，刮住咁畫唔太順暢，
較難畫到又平又smooth嘅眼線，
顏色夠黑，但係會反光果種，自己唔係咁鍾意，
呢個價錢市面上有好多選擇，
所以我唔會揀呢支。

Jellia:

呢枝眼線筆筆頭好似枝marker咁，
筆頭好硬，畫上眼好吉，
每畫一下隻眼都feel到好硬，
畫呢條眼線我都分開咗幾下畫，
因為畫畫下就好似無色，
係未乾時再畫多下就有一片片黑色嘢甩出嚟！
我唔建議大家用啦！

Una:

粗幼好似控制,
不過筆頭真係好硬,
如果平時好少畫眼妝, 可能會覺得好吉好痕

我畫眼線都係鐘意筆頭軟D,
市面上好多眼線筆筆頭, 防水力都比呢款好好多,
所以我就唔會選擇呢支眼線筆了。

總結：
innifree同holika holika嘅產品，經試用後，
同事們都覺得保濕同滋潤效果都唔錯，
成功通過我地嘅測試！大家不妨買嚟試試！
但係Kiss Me Eyeliner嘅試後感就認真麻麻喇，
全部同事都覺得好吉眼又唔舒服，
防水能力又一般，冇咩特別，
意見一致，唔建議大家買。

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup