上次同大家分享咁我去日本旅行買咗啲咩嘅戰利品，
今次就同大家分享下我去日本食咗啲咩美食啦！
我都已經去過日本幾次，
講起食相信好多人同我唸法一樣：
「其實去到日本是旦揀間鋪入去食都好食㗎啦！一係多人排隊嘅個間一定好食!」，
如果有呢個唸法就中伏啦！因為今次去我都食過間麻麻地嘅店，
當然都有好多都係好正嘅野食啦，
唔講咁多！立即同大家分享下唔同嘅美食啦！

拉麵篇：

我一落咗機就超想食拉麵啦！
所以一放低行李就去咗酒店附近有間拉麵店到食，
入到去先發覺全部都係男士，不過都已經入咗去，
就叫咗呢款拉麵，超大碗呀！2個人先食都得晒呀！
味道都好濃，啱晒我口味，啲配菜嘅仲有得比我揀分量添，
（店員唔識講同聽英文，所以要講小小日文先溝通到!）

地點：東京歌舞技町
價錢：700 YEN
美味指數：4＊ (6粒＊為滿分)

呢碗拉麵我係有日去咗上野公園行下經過，居然見到好多人排隊，
咁我就入咗去食啦！真係覺得去到日本食任何一間拉麵都好好食，
加埋之前去過幾次日本，食超過10幾間都一樣好食∼
呢間一睇份量就見到真係大大碗呀！
你order拉麵佢仲會送碗飯比你，不過見到碗拉麵我就已經呆咗，
當然無要到碗飯啦！
地點：上野
價錢：990 YEN
美味指數：5＊(6粒＊為滿分)

Supermarket 篇：

今次去日本我主打去supermarket買野食呀，
因為旅行書上個啲鋪頭，好多間我之前都有試過！
Supermarket 行到差唔多日日都必到，
因為實在有好多唔同嘅美食啦！太吸引我！
成日都買刺身返酒店食，
啲刺身好新鮮，完全唔洗落任何嘢，
就咁食都好好味，仲買咗隻蟹嚟食添！
價錢唔貴又超好食，正呀！
除咗買呢啲之外，我都買咗啲生果，生果都好正！
士多啤梨同蕃茄，都係我至愛呀！

1. 美味指數：5＊(6粒＊為滿分)
2. 美味指數：6＊(6粒＊為滿分)
3. 美味指數：4＊(6粒＊為滿分)
4. 美味指數：0＊ (6粒＊為滿分)
5. 美味指數：3＊(6粒＊為滿分)
6. 美味指數：5＊(6粒＊為滿分)
7. 美味指數：5＊(6粒＊為滿分)
8. 美味指數：4＊(6粒＊為滿分)
9. 美味指數：5＊(6粒＊為滿分)

如果大家唸唔到想食咩刺身，
可以揀呢啲什錦刺身，一樣都好好食！
美味指數：5＊(6粒＊為滿分)

呢隻蟹真係不得了，太好食啦！
好鮮味好甜！鍾意食蟹嘅你必食呀！
價錢：約港幣110
美味指數：6＊(6粒＊為滿分)

另一樣去到日本必食嘅係士多啤梨，超甜超大粒，
我係誇到每日都買一盒嚟食，
其實士多啤梨都有分唔同產地，
以我食咗幾日嘅經驗，發覺”福岡”嘅最甜最好食！(下圖)
價錢：553 YEN
美味指數：6＊(6粒＊為滿分)

除咗士多啤梨，我每日都必食蕃茄仔（左），
佢價錢超平，如果係都要我揀鍾意食邊樣多啲？
我肯定最愛蕃茄仔，我鍾意到買咗3包返嚟香港食添！
佢圓潤嘅身型夠晒飽滿，咬落去係超鮮甜超多汁！（唔∼無得頂呀！）
價錢：369 YEN
美味指數：6＊＊＊＊＊＊(6粒＊為滿分)

我嘅每日健康孖寶∼

築地篇：

其實我去築地一心係好想再去食大和壽司，
因為之前去食過係超好食！
可惜係今次已經勁多人要我等5個鐘，
我當然無等啦，走咗去一間好多日本人排隊食嘅壽司店到食，
只怪我貪佢有兩層會排得快啲，咁就中伏啦！
佢打破晒我一直覺得是旦一間都好食嘅唸法…
(見到我係圖嘅左下角整咗個嬲嬲地嘅圖案嚟表示我嘅不滿！)
老實講又唔係話難食到食唔到嘅…而係同我預期嘅差好多，
如果要我具體啲去形容嘅話，
佢同香港嘅「爭鮮」差唔多，但香港嘅「元氣」好食過佢好多∼
所以明白我真係覺得自己中伏！
價錢：2000 YEN
美味指數：1＊(6粒＊為滿分)

呢間係井上中華拉麵，
又係一間好多人排隊嘅拉麵鋪，
味道好一般，好似食公仔麵FEEL，
試過就算，對佢無咩留戀嘅感覺。
價錢：650 YEN
美味指數：2＊(6粒＊為滿分)

呢間令我深刻嘅係個亞婆好串，
一落排隊一路見佢係咁話人，
對人指指點點咁，
不過又係好多人排隊，所以咪試下，
呢個什飯又出奇地好食，
一路食一路覺得佢真係串得起，
食到第三間，終於有一間係算得上美食啦！
價錢：800 YEN
美味指數：4＊(6粒＊為滿分)

行行下又比我見到呢個和牛串燒，
又係見到好多人買嚟食，
我咪又跟住買嚟試，都幾好食呀！
鍾意食牛嘅人一定要試下。
價錢：500 YEN
美味指數：4＊(6粒＊為滿分)

行行下發現呢間嘢，
其實經過咗幾次都係一個人都無，
不過我真係有啲想食，所以就Order一隻燒蠔食下，
佢係今次我覺得係築地食過最好食嘅野，
嚟咗2日都要翻食嘅蠔！
第二日仲試埋扇貝添，
兩樣都好食，不過我覺得蠔係最好食，真係好鮮甜！
蠔價錢：300 YEN
美味指數：6＊＊＊＊＊＊(6粒＊為滿分)
扇貝價錢：500 YEN
美味指數：5＊(6粒＊為滿分)

近鏡睇,佢哋都好大隻，好抵食∼

其他推介美食：

呢間係我去親日本都必去食，
佢個蟹膏係超正，壽司都幾好食！
相信好多人都識呢間”美登利”

雖然都係要等，起碼等一個鍾，但值得嘅！
呢到啲人個個都好nice，
食食下同隔離嘅客人好傾到乾杯添！
地點：涉谷
價錢：2160 YEN
美味指數：6＊(6粒＊為滿分)

終於到Tea下嘅時間啦∼
去LOCCITANE CAFE到食甜品，
日本啲甜品真係無得輸，超好食！

我特別鍾意(左)生果雪芭同(右)士多啤梨批。
地點：涉谷
價錢：2900 YEN
美味指數：6＊(6粒＊為滿分)

呢兩個都係上野公園內嘅小食店，
(左)烤魚：又係估唔到咁好食，
好香口又好美味。
(右)櫻花味：好似櫻花味糯米團咁，口感好得意。
地點：上野公園
(左)價錢：600 YEN
美味指數：6＊(6粒＊為滿分)
(右)價錢：300 YEN
美味指數：4＊(6粒＊為滿分)

日日返酒店都經過，最後一日就揀咗呢間食，
佢係任食，有成100款野食揀，
唔單止得壽司，連小食前菜都有，
壽司嚟講，呢間居然係我係呢個Trip裡面，食過最好食嘅一間！
對上一次嚟都有食過呢間，(不過係散叫而唔係任食。)
都已經覺得好食，(但上次有食過大和壽司，所以就覺得大和最好食！)

真係好新鮮好好味,
不過要提提大家唸清楚先好ORDER，
因為雖然話係任食，但最多只可以點3次，
所以要預算好自己要食幾多份量呀！
份量就無限嘅∼
地點：東京歌舞技町
價錢：3240 YEN/位
美味指數：6＊ (6粒＊為滿分)

一口氣同大家分享咗咁多美食，
我一路寫就一路回味中，
真係好想再飛去日本食多轉呀∼

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup