好多人都話化妝呢行好窄，競爭又好大，
畢左業之後驚無job做，
其實大家要唸下夠竟係咪自己學完都疏於練習，
技巧會退步左呢？
唔好好裝備自己，job又點會長做長有呀？
Christy同Karen兩位都係我地既畢業生，
到而家已經成為左我地makeup team既一份子，
而Karen亦都開始做堂上助教啦，
今日就搵左兩位分享當中既感受啦！

大家好，我係Christy ，原來對上一次同大家分享已經係一年前，
時間過得真係好快，一年後既今日我又係度做緊咩呢？
今日等我同大家分享下先！

上年我修畢左新娘化妝班，當中感受其實都好深。
相信大家同我一樣係髮型既初哥，
記得有一堂billy sir話教扎辮，
我就心唸：唔係掛？扎辮都要學？我小學已經識啦喎。
點知呀sir教完我先知辮可以分
三手凹辮丶三手凸辮、四手辮、魚骨辮、圓辮、三手凹/凸加辮…

oh my god!原來淨係扎辮都有排你學呀！
但當學左技巧之後靈活運用加埋創意就可以做到好多靚髮型架啦。
髮型始終係我弱點（相信好多同學都係），
但到最後可以係新娘班考試拎到第一名，
髮型個part係幫我拎左好多分架！

所以要成日記住，一件事重複做會變成你擅長既事，
一件你擅長既事用心做，就會變成你成功既事架啦！
好老套但又好岩，呢行係無捷徑既。

畢左業之後，有次好深刻既out job,
果次我負責帶hair product，
之前一晚係咁check驚帶漏野，又要好早去到新娘屋企，
所以成晚訓唔著呀！
朝早去到目的地，先知原來得我同Janice !!!
之後佢叫我幫新娘個頭set base!其實我超緊張（當然自己知好啦）…
因為平時只係練開假人頭，今次既新娘仲係Janice既朋友，
就更加唔可以失禮啦！當我差唔多set好個base,
Janice 就已經好快咁化完個全妝啦，
然後佢再幫手set左個靚頭咁就完成左，我先鬆口氣。
Janice之後亦有提番我下次點可以再做得好啲，
真係一次好寶貴又難忘既經驗呀！
所以平時既練習真係好重要，因為你唔知機會幾時出現你眼前架。

一年後既今日我好好彩有機會加入workshop工作,
我都想自己更加進步，所以亦再報讀Advance班，
因為唔想自己局限淨係識新娘化妝。
而Advance班可以學更加多唔同類型既妝，
紅唇剔眼線、閃粉妝、skin care妝、大眼妝、唔同年代既化妝等等

上完第一堂己經覺得比basic班難好多呀，
basic班主要係學好基本功，而家進階班要求就高左好多，
要打好個根基先化到高難度既妝架。

JANICE亦都好嚴格要每part check住！
記得我畫紅咀果陣真係要閉氣架，
真係好驚會畫出界呀!
實在太有挑戰性啦！
大家都要努力練妝先唔會退步架。

Karen:

雖然喺workshop工作都有一段日子，
但係其實一直都有好多新嘅嘢學。
化妝方面，平時跟Janice出job，
每次化嘅妝都有唔同嘅要求。

最近見Janice幫Bazaar做嘅閃粉妝，
真係覺得好唔簡單！
雖然之前上媒體班都有學過，
但當然同呢個level差好遠啦，

唔止要有技巧，仲要有美感，
唔係隨便拍啲閃粉上面就OK架。
除咗上堂之外，好多時候真係要出去親身睇過、做過先至學到嘢。
因為實際工作情況有太多因素影響，
例如環境唔理想、燈光好暗、甚至冇足夠工具，
都要即時搵解決方法去完成工作。
可能有同學會覺得出outjob,
如果冇機會自己動手幫人化妝，出去都冇乜意思，
當然Janice工作時候都會講我地要注意嘅地方，
但係其實好多嘢都要靠自己觀察去學。

早排亦有學進階嘅髮型，就係好大挑戰性嘅finger wave喇，
真係好難，但係有機會學都一定要學嘅，
因為其實真係好靚，
vintage feel感覺可以好高貴，好fashion，
當然係要好熟練先可以做到啦！

除咗出outjob之外，而家多咗好多教班嘅機會，
比起最初唔習慣喺咁多人面前講嘢，
而家已經習慣咗啲，
雖然有時都會緊張，但唔會好似以前咁怯場，
所以做咩都要不斷練習，先可以有進步架。

大家千期唔好以為畢左業之後就識曬，唔洗練妝呀！
岩岩初出道又或者學緊化妝既你，
要清楚自己嘅缺點加以改善，仲要不斷練先會有進步。
並唔係撻曬啲顏色上面就叫化妝，
首先最基本嘅底妝要做得好好，
正如想畫一幅靚畫都需要張乾淨既畫紙啦！
唔同人有好多唔同既暇疵，亦有好多種遮法，
要搵多啲唔同既人黎練習，先可以靈活運用咁多種既技巧架
長氣都要講番句，同學要勤力練妝呀！

欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup