相信有去過旅行買 skin care 嘅你地（尤其係去韓國）都會試過，
買完野硬係會比 sales 塞多一堆 sample 落袋，
驚死大家唔用佢地啲產品咁！
但係啲 sample 多到邊隻打邊隻都唔知、有咩功用又唔知，
好似得物無所用。
所以今次我地抽咗幾款唔同品牌嘅產品 sample 出嚟試。
我地幾位同事嘅膚質都各有不同，
希望我地嘅試用報告可以幫到不同膚質嘅讀者喇！
試用報告只供參考，
大家要根據自己嘅膚質同需要去選擇呀！
首先簡介一下各同事嘅皮膚性質：
Irene: 混合性偏乾
Karen: 乾性
Jellia: 中性，鼻位易出油
Christy: 混合性偏乾，鼻翼位易甩皮
goodal Repair Plus essential oil
呢幾包係 Janice 上次去韓國出 Trip 果時拎返黎，
Janice 都話唔係好記得幾時拎，
不過應該喺明洞就會搵到，價錢方面都唔會太貴。
由7種植物油成份組成，
包括山茶油、堅果油、荷荷巴油、太陽花籽油、
綠茶籽油、橄欖油及夏威夷果油，
有保濕滋潤、鎮靜敏感皮膚，
抗氧、提亮膚色、緊緻肌膚等功效，
除咗可以搽面同身體之外，
亦可滋潤乾燥受損頭髮，
指甲邊乾燥有倒刺，亦可當作指緣油。
Karen:
質地唔會好杰，唔會好油淋淋嘅感覺，
按摩咗一陣就差唔多吸收晒，
感覺滋潤，皮膚有光澤啲同更加柔軟。
今次我試嘅時候拎左相入面咁多嘅份量，可以按晒全面。
因為上面之前因為無搽 cream，所以就拎得比較多。
如果搽左 cream，可以視乎皮膚狀況而睇下用幾多，
或者倒5﹣7滴用喺乾嘅位置按摩。
Irene:
質地唔算太油，
滴幾滴喺掌心按上面，代替咗平日用開嘅cream，
按嘅時候都好快吸收，面帶帶少少光澤感。
仲有陣好似去做spa嘅味，感覺好relax，
到第二朝早洗完面就覺得皮膚soft咗同冇出油。
我自己都幾鍾意呢隻texture，
如果價錢比其他品牌平嘅話都會考慮入手。
總括：
呢隻essential oil唔會太油同塞住毛孔，Karen同Irene都話值得一試。
Mamonde Age Control Power Serum
Mamonde夢妝，雖然香港未有專門店，
但佢嘅玫瑰水toner比較多人知道。
今次要試嘅係佢嘅serum。
主要有5種紅花成份：
山茶花、朝鮮薊、三色堇、雛菊花、天竺葵，
山茶花有效抗氧化，能增強肌膚自我保護能力，
朝鮮薊含豐富彈力成份，能增加皮膚彈性，
三色堇性質溫和，能美白提亮膚色。
雛菊花有效緊緻毛孔，天竺葵能改善疲倦肌膚。
Jellia:
初時見到包裝上寫住“Age Control"，
心唸：會唔會好笠，因為通常都係好杰身質地嘅嘢！
點個一打開見到又唔係，
佢嘅質地屬於Jelly狀，
搽咗上面都易推開，
但可能我兩頰屬於中性皮膚，
所以吸收就比較慢，
當吸收完之後又唔覺佢特別滋潤...
如果大家係我嘅皮膚性質而用佢就OK，
但如果係比較乾嘅皮膚就應該唔夠保濕啦！
至於美白功效，可能因為我只試用一次，
就唔覺有呢個效果啦！
innisfree Apple Juicy Liquid Foaming Cleanser
innisfree最抵買就係佢啲mask，
亦有好多人都有用佢嘅綠茶系列，
今次呢個青蘋果cleaner唔知效用又o唔ok呢？
主要成份有蘋果萃取物、維他命C、薰衣草萃取精華，
能有效去取老化角質，令肌膚更有柔軟同有光澤，
亦有保濕作用，洗面後皮膚唔會繃緊。
無添加礦物油、人工色素、動物性原料及酒精。
Jellia:
之前有用過佢嘅洗面膏，不過係Green Tea味，
今次見佢係蘋果味真係好有興趣試下，
一打開包裝就已經好香蘋果味，
加少少水都好易起到泡泡，
但洗完面之後有小小乾嘅感覺，
油性皮膚嘅人用可能就啱啱好啦！
Karen:
好香蘋果味，幾醒神，
Gel水狀質地，加少少水就起到泡，
洗完感覺好乾淨好清爽，仲幾滑添。
但過咗一陣就覺得有少少乾，
所以要即刻搽番skincare。
而我皮膚係屬於乾性，所以就未必考慮呢款 product 喇。
Irene:
首先佢係透明洗面gel質地，
打開包裝，就有好香青蘋果味，
感覺唔似人工味道,，所以都幾討好。
佢加少少水就好容易起泡，
沖完水，面感覺幾滑同埋都洗得好乾淨，
不過就會有微微繃緊感覺，
可能冬天用就未必夠喇!
所以下次有機會都會拎返啲sample當旅行裝用。
總括：
呢隻水狀cleanser好易起泡。
不過我地幾個都係皮膚偏乾性，用完感覺有啲乾，
所以呢隻清爽乾淨嘅cleanser就比較岩中性至油性皮膚。
欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup | 
