|
保濕既護膚品無論係咩膚質一年四季都要用呀!
好多人都以為夏天唔需要用保濕產品，咁就錯曬啦!
因為夏天經常係冷氣地方，會抽乾皮膚既水份，
分分鐘會乾過冬天架!
今次我地會介紹幾款唔同既保濕產品比大家。
好多人搽極保濕產品都仲係好乾咁，
好大嘅原因係肌膚表面太乾，又或者有層角質隔住，
產品嘅養份根本滲唔到入去底層肌膚。
所以我地一定要用toner去除角質，
同時增加肌膚嘅濕潤度，
咁肌膚先可以真正吸收到需要嘅營養，
之後搽嘅護膚品，功效就可以發揮得更好啦！
Clinique Clarifying Lotion Twice A day Exfoliator溫和潔膚水
$180 (200ml)/ $290 (400ml)
呢支潔膚水有效清理老化角質同消除暗啞，
用完皮膚有光澤啲,
仲可以令之後用既護膚品發揮更好既功效架 ！
水狀質地，用後非常清爽，比較適合油性皮膚用。
用黎抹走面上既死皮好有效架，
before＞after
 
提提大家 ：好多人會用手拍上面黎用，咁係唔正確架！
呢類清潔型既toner 應該要配合棉花以抹既方式用先啱架。
全新肌研極潤保濕化妝水(清爽型） $135/170 ml
肌研係我自己好鐘意既一個開架品牌，
佢出名平，品質又好好 ！
今次佢推出左全新系列，分左清爽同滋潤型。
圖中呢支係清爽型，入面蘊含納米級透明質酸，
其分子量仲係普通透明質酸既 1/20呀！
呢支同舊版比較真係水身少少，
而且佢出左名敏感肌可以放心使用，
因為當中成份為弱酸性，
低刺激又不含香料、色素同礦物油 ！
平時用完化妝棉抹完之後，
可以倒多少少喺手上，
再輕輕拍上面，加強保濕效果。
仲可以倒少少份量係化妝棉，
敷係特別乾既位置，當埋mask用添。
唔知大家有冇搽精華嘅習慣呢?
如果大家想保濕效果更好嘅話，
護膚程序不妨做多一步，
搽完toner之後，搽cream之前搽埋保濕精華啦！
LOVEISDERMA 雙效維他命B保濕精華 $287/30ml
呢支係台灣出品既保濕精華，最近非常火紅呀 ！
我自己好鍾意化妝之前用，保濕超快吸收，
質地唔厚，又唔會有擦子膠碎情況出現。
圖中都可以見流得好快，唔會痴笠笠。
呢款賣點係入面有維生素B5同時有埋維生素B3，
做到雙效修護同預防細紋產生，
成份亦不含防腐劑、香料，又係敏感肌既恩物呀 ！
之前呢支精華好多人話要上網買好麻煩，
而家萬寧有得買啦， 趁有折買仲抵呀 ！
GLYCEL 亮白雪肌細胞力量活膚精華 ＄1080／1.5ml x10枝
而家天氣咁曬咁熱，香港女仔都鍾意追求白雪雪既皮膚，
呢一盒十枝既美白精華係品牌既重點推介，
含阿爾卑斯山玫瑰幹細胞及春露水，
加上維他命PP結合高效水芥亮白精華，
可以抑制誘發色素產生既酵素，
阻止黑色素擴散，均勻膚色同時分解斑印色素，
令肌膚回復白滑，
想保濕兼美白既朋友就啱晒喇。
Dramatically Different Moisturizing Lotion+ 升級特效潤膚露
$170 (50ml)/$360 (125ml)
成份有向日葵籽, 大麥精華及青瓜精華萃取，
透明質酸、甘油、天然補濕因子等，
有效為肌膚補充足夠水份，
令肌膚底層更水潤健康。
質地呈淺黃色，好薄，
質地易推，一推開就吸收晒 ，
唔會有黏笠感。
混合性或中性肌膚都適用。
除咗可以當保濕lotion之外，亦可作為肌底液，
之後再搽其他護膚品加強滋潤效果，
皮膚乾嘅朋友就可以試試呢個方法喇。
搽完精華之後，當然要做番正常護膚程序啦！
以下都係一啲質地清爽嘅保濕產品，
好適合而家夏天用架！
L‘OCCITANE Hydra Vital Gel 天使草水盈保濕啫喱 ＄330／50ml
呢個蘊含天使草籽精華油、天使草水同乳木果油，
促進水通道蛋白的合成，
可以改善皮膚水份循環，增強自我保濕能力，
仲可以做到即時同24小時深層保濕添,
氣味好清香，有陣草香味 ！
呢個天使草系列都有呢種香味，
用完好似訓左係片草地上咁haha!
可以見到質地都好薄，
推開好清爽唔笠但又非常保濕，
好多護膚品做到保濕但未必做到鎖水功能！
用完呢個就係冷氣地方都唔洗驚啦。
特別啱中性至混合性皮膚使用，
鐘意gel狀護膚品既朋友就快d 試下啦!
VICHY 溫泉礦物活水循環保濕清爽啫喱 ＄250／50ml
又一清爽啫喱推介 ！
入面含有主打溫泉水成份可以做到強化肌膚防禦力，
更採用兩倍高濃度透明質酸，
專利醫學保濕成份絲柔鎖水因子，
可以深入打開細胞間既水通道，激發活水循環 ！
加入最新清爽不油膩配方，
就算係比較厚身嘅透明gel 質地，
但感覺都係好清爽，而且好快吸收，
氣味好舒服，特別適合春夏轉季敏感肌膚需要，
屬缺水皮膚既朋友就可試試呢個！
秀麗韓HYO WATER-SPRING MULTI CREAM ＄498／75ml
韓風襲港，好多韓國美容品牌紛紛跳出！
呢隻集面霜及面膜兩者功效於一身！
平時當面霜用可以係肌膚表面形成水份保濕膜，
鎖緊肌膚底層水份，令肌膚keep住水潤。
厚敷作為水份面膜，充份補水之餘，
可以解熱降紅，
同時舒緩鎮靜發紅發熱嘅肌膚。
質地似gel cream狀，推開完好似有層保護膜咁！
成份有專利成分發酵人蔘透明質酸，
微小分子好快滲入皮膚，
幫助皮膚補水，
預防乾燥引起嘅老化現象，
加上發酵綠茶成分，
可以排毒、抗氧化、舒緩及鎮靜肌膚。
乾性皮膚就啱晒啦！
聞落去有淡淡既人參味，質地亦都唔會太笠，
鍾意人參既朋友一定要試下啦 ！
比個小tips大家，
上妝前用gel狀質地嘅護膚品，
有機會有擦膠碎情況出現，
所以建議大家上妝前用cream或lotion狀嘅護膚品，
Gel狀skincare可以留番夜晚用啦！
欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup | 
