Rossini蘆薈多用途保濕啫喱 $17
韓國製造嘅蘆薈gel mask，聲稱99%純蘆薈製造，
不含著色劑及paraben防腐劑，
有多種用途，作為曬後護理有舒緩作用，
除咗用嚟做body lotion,亦可以用於頭髮上，滋潤保濕。
用嚟做sleeping mask都得。
Karen:
本身皮膚好乾燥，雙腳乾到好多紋，甚至甩皮，
今次就試試呢個gel用嚟搽body，
睇下有幾保濕先。
一打開蓋，氣味非常唔討好，太濃人工香料味，
搽上身之後變咗草藥/藥酒味，幾難聞，
推開就好似變咗水狀，好快就吸收晒，
搽勻後有少少黏黏地，啱啱搽完係有即時嘅濕潤效果，
但係過咗一陣就乾番，唔last得耐。
唯一可取之處係搽上去嘅時候感覺幾涼，
當舒緩下就可以，但係for保濕就唔work喇。
Jellia:
呢盒蘆薈GEL一打開就聞到好大陣人造香料嘅味，
一啲都唔似蘆薈味，試過搽上手，
等佢乾咗之後有陣跌打酒味添…好古怪呀！
不過都要試一試佢嘅功效，
今次我試咗上頭髮到，因為佢盒面寫住可以保濕頭髮，
老實講因為我嘅頭髮本身都有啲打結，
所以一路搽上頭髮嘅時候都一樣好打結，
等啲Gel乾咗就更加打結，仲會有啲黏住一撻撻嘅效果，
完全感受唔到作有保濕作用，大家可以唔洗買啦！
Tony Moly My Little Pet Wrinkle line patch $15/1pc
呢個mask專係針對面上虎紋去造，
可以集中護理皺紋，
而mask質地用咗水凝膠膜，
大約敷30分鐘之後就可以再輕拍吸收，
令法令紋恢復彈性緊緻。
Irene:
呢個mask唔似平時個啲paper mask，
佢質地好似啫喱咁，就算敷耐咗都唔會覺得乾，
同埋幾貼服，我自己都幾鍾意。
因為自己法令紋都唔算勁，敷完都唔算有好大分別，
係敷完個個位置係水潤咗，
不過如果特登用15蚊買呢mask，
就覺得好唔抵，用15蚊買全面mask好過！
筆神眼線筆（極黑）$89
筆神眼線筆尖幼，可以畫出鮮明嘅眼線，
佢有速乾配方，簡單又易用，又唔易化開，
持久耐用，另外，佢含各種保濕成分同維他命，
唔傷眼部嘅肌膚。
Jellia:
初時見到呢支眼線筆個名叫「筆神」，以為流流地，
因為個名實在太得意，但試咗上手就知原來係正嘢，
佢好幼身，又好易畫，又實色，
畫幼眼線又得畫粗眼線又得，最緊要好快乾，
唔會印到周圍都係。
我係屬於油眼人，之前試過好附眼線筆都會化開又或者好快就甩，
但呢支眼線筆我用咗一日（大約8個鐘），真係完全無甩過，
以呢個價錢嚟講，個人認為真係好值得買呀！
Irene:
首先支筆頭好好畫又夠尖，畫時候好順滑，
想畫粗或幼眼線都得。
而且啲墨夠哂黑，所以畫出嚟好實，都好快乾，
本身自己成日流眼水，有好多眼線筆都會化，
但呢支又無呢個情況發生，89蚊又幾值得買，
我都會考慮買一支嚟用！
Una:
筆頭好幼好尖，好輕易就控制到眼線嘅粗幼度，
而且質地好快乾，唔需要擔心畫眼線期間有眼線液摺入眼皮。
另外，質地好容易卸，
只需要用普通嘅卸妝水就可以徹底卸去眼線。
而且眼線都 keep 到好耐,
使用期間無試過甩色。
WOWWOW Nail Polish #01
Karen:
質地比較稀，所以好易搽，
而且可以好平均，唔會一舊舊，
搽一層效果比較透，
本身鍾意實色啲，所以覺得搽兩層就好啲，
可以遮晒本身指甲色。
唔算乾得特別快，因為搽完兩層約5分鐘摸下都仲未乾，
乾身後冇“令”身果種光澤感，
即係唔可以skip搽top coat嘅步驟。
因為對我嚟講易搽係首要條件，
所以總括嚟講我覺得都可以一試。
Christy:
我自己揸指甲油成日都會揸到手震震,
不過呢支指甲油個掃頭都易揸,
我揸兩層效果幾實色,
顏色我自己都好鍾意,但有少少難乾,
今次無揸top coat想測試下佢既long keep程度,
但發覺兩日後邊位就易甩色,
所以大家想用呢支指甲油建議都最好揸番top coat係面啦。
TONYMOLY My little pet body patch $15
Christy:
相信大家都好介意自己既肥肉,
我聽到無論食定用既減肥既產品對眼都發一發光!
呢塊聲稱可以用係全身既減肥貼,
可以加快脂肪代謝,仲含有膠原蛋白成分，
做到增強肌膚的彈力，緊緻肌膚既功能添!
我聽到就啦啦聲貼左係自己既肥手臂上,
敷上去冰冰涼涼好舒服,
涼既程度都維持左好幾個鍾,
佢就預你會敷過夜,我就敷左8個鍾。
不過敷完就無咩效果,水腫都無減過
敷完都唔覺皮膚有緊緻同滑左。
以為呢塊係懶人減肥恩物,
我都係勤力啲做運動好過啦!
欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup
