相信有去過旅行買 skin care 嘅你地（尤其係去韓國）都會試過，
買完野硬係會比 sales 塞多一堆 sample 落袋，
驚死大家唔用佢地啲產品咁！

但係啲 sample 多到邊隻打邊隻都唔知、有咩功用又唔知，
好似得物無所用。

所以今次我地抽咗幾款唔同品牌嘅產品 sample 出嚟試。
我地幾位同事嘅膚質都各有不同，
希望我地嘅試用報告可以幫到不同膚質嘅讀者喇！

試用報告只供參考，
大家要根據自己嘅膚質同需要去選擇呀！

首先簡介一下各同事嘅皮膚性質：

Irene: 混合性偏乾

Karen: 乾性

Jellia: 中性，鼻位易出油

Christy: 混合性偏乾，鼻翼位易甩皮

Holika Holika三秒保濕水

2012年打入香港市場嘅Holika Holika以彩妝比較出名，
今次skincare嘅呢個三秒水賣點就係洗完面之後3秒立即補水。

洗完面後毛孔打開，面上水份流失得最嚴重，
洗完臉三秒鐘內一定要補充水份，
呢個時候補水效果亦係最明顯，
所以“3秒”係指洗完臉3秒鐘係黃金補水時間，
呢個保濕水含天然透明質酸成份，保水同滲透力強，
可以快速補充皮膚水份。

Jellia:

我洗完面即刻就將保濕水倒落手到搽上面，
質地係gel狀，都易推開，無咩味道，
不過搽咗上面，我覺得有啲黏黏地嘅感覺，
可能因為佢成份有透明質酸啦，
對我嚟講好似潤咗啲啦！

Karen:

gel狀質地超快吸收晒，
感覺幾清爽，完全唔黏笠，
夏天朝早用就啱啱好。
不過如果夜晚用或者冬天就應該唔夠潤喇。

Christy:

起初以為佢質地好水，
原來都有少少黏既感覺，
不過我推開就好快吸收幾爽身，
用係T字位都唔錯，
不過我兩頰偏乾就略嫌唔夠潤啦。

Irene:

質地比普通toner厚身，帶gel gel地質感，
初初會覺得有少少黏黏地感覺，
但上面後，就好快吸收，感覺都好水潤。
之後再用其他skincare，感覺更加易吸收。

總括：
呢隻略帶gel狀嘅三秒水係由要持績咁用先有效果，
不過我地試用過之後，覺得對於皮膚偏乾嘅人黎講唔太夠潤，
所以呢隻就會比較岩中性至油性皮膚用多啲！

Holika Holika膠原蛋白三秒緊致抗皺水
含天然膠原蛋白(骨膠原)成份，
有效保濕鎖水，令肌膚更水潤。
妝前使用可以令妝容更貼服。

Jellia:

佢嘅質地比上面嘅保濕水更杰身小小，
我一樣係一洗完面即用手搽上，
個人認為佢比三秒保濕水更易推開，
都係同三秒水一樣無味嘅，
搽咗上面無耐就已經吸收晒，
搽完之後塊面仲好似滑咗啲添！

Karen:

質地好似啫喱咁，近似gel cream質地，
比保濕水潤身，好易吸收，
搽勻後有少少黏黏地，再過一陣就爽身。
搽完感覺皮膚軟滑啲。
我覺得呢種可以當爽膚水用，都適合我嘅皮膚。

Christy:
質地都係比較杰身，仲比保濕水更滋潤，
滋潤度對我黎講岩岩好，
我鼻位都易甩皮，
但用完佢之後甩皮就即刻有改善,
仲覺得有少少光澤感。

Irene:

呢一款質地似gel狀嘅透明質酸，
上面後，吸收能力就比頭先三秒水要多少少時間，
而吸收完後都覺得好清爽，
好適合夏天天氣用。

總括：
同樣係三秒水，呢隻就唔同成分唔同texture，
我地試用後覺得呢隻比藍色裝好用同滋潤，
所以岩乾性或者混合性皮膚持續用，
而中性至油性皮膚就未必岩用喇。

欲取得更多第一手美容及扮靚資訊

可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup