又到咗每月一次嘅好物雷品分享啦！

身為shopping精嘅我地平時買買埋埋都唔少野架，
當中梗係會遇到中伏嘅產品啦！
今日就等Workshop同事分享下有咩值得推介先。

好物：

Jellia:

KOJI Linequeen極細防水眼線液-黑色 $85

我最鍾意就係買眼線筆嚟試，
而今次好好彩買到支唔錯嘅眼線筆，
價錢又好合理，
只係85蚊係SaSa就買得到！

佢係幼身嘅liquid eyeliner，筆芯只有0.1mm，
粗幼度好易handle，易畫又實色又快乾！

呢支眼線筆真係好防水，
因為我眼尾成日流眼水，
好多其他嘅眼線筆會好容易化，
但呢支就無呢個問題，我出完街再返到屋企都唔洗補呀。
如果同我一樣成日流眼水嘅人可以試下。

Christy :

SANA New Born眉筆 約＄9X

呢支眉筆係我去日本買番黎既戰利品，
我特別鐘意佢係因為佢好容易畫之外，
仲非常持久，平時最尷尬就係條眉去到下午就開始甩色，
不過佢就無呢個問題發生啦！
畫出黎仲好soft好自然添。
而且佢3合1既設計好方便，
一支已經有齊眉筆、眉粉同螺旋刷，
帶出街用就好方便啦。

Irene：

3M暗瘡貼

大家知我好日都唔會生暗瘡，
但可能近排成日夜訓、又大壓力，再加埋又轉天氣，
我額頭就開始不停出暗粒，同埋敏感與暗瘡之間嘅物體，
前幾年都試過有咁嘅情況，都叫做有少少經驗，
一嚟額頭停止搽滋潤性面霜，只係搽水分產品。
避免額頭太有營養，不停爆粒粒，
最好當然連妝都唔好化，不過工作需要又真係比較難。

但每當生暗瘡或暗粒時，我都會即刻拎呢個暗瘡貼出嚟，
假如個粒暗瘡放咗膿或有傷口，我都會夜晚用暗瘡貼過夜，
可以吸走傷口分泌物或膿，防止漫延到其他地方，
而且我仲覺得可以令傷口快啲好返，
好推介俾成日生暗瘡朋友！

雷品：

Christy ：

Pdc 膠原緊緻溫感面膜 ＄120

我自己平時好鐘意敷GEL MASK,
見到呢支面膜入面含有緊緻成份，膠原蛋白同玻尿酸，
敷上去仲識發熱我就好有興趣啦!
點知我用完一次已經想掉左佢！
首先，佢有一種好人工既花果味，我就唔太鐘意啦！
質地好黏笠，黏到好似膠水咁，
非常難推！
敷完唔覺得保濕左，仲覺得好蹦緊，
而且仲有少少痕既感覺，
敏感皮膚就建議唔好試啦。

Ivy：

B﹠C BROWLASH EX 24小時防水眼線液 ＄79

當初買呢支liquid eyeliner既原因，
係因為本身用開呢個牌子既mascara，
覺得支mascara好好用、好輕身，又有自然既效果。
但呢支liquid eyeliner就令我有啲失望喇…

佢質地偏水，
劃上眼度要一段時間先乾，
一個唔小心畫眼線時眨左下眼就好易沾污眼皮，
都幾麻煩！
而且佢唔夠實色，
筆尖又唔夠幼身，
較難畫到線條較sharp既眼線，
初初買佢係因為見佢個包裝寫住24小時持久
但我唔係油眼 4,5個鐘後眼頭位置已經開始溶喇…
市面上我覺得仲有好多較好既選擇，
所以唔會再用佢喇！

UNA：

面部清潔掃 (大約$80)

因為自己塊面好易出油，
容易積聚油脂，加上呢支掃價錢平過香港，
(香港見過賣$108, 日本賣$80左右)
所以就買咗喇！

打開用時覺得佢嘅掃毛好軟，
感覺其實真係幾舒服嘅….
不過用完感覺好似無咩特別。

效果純粹係令潔面液起得多d泡泡,
應該係因為呢支掃嘅毛太軟喇，
感覺清潔唔到毛孔內比較深層嘅污糟嘢，
用完塊面都唔覺得有特別乾淨。

另外，由於呢支掃嘅結構設計，
每次用完直到第二次再用時都未乾，
好多時掃毛都係處於濕淋淋嘅狀態，
其實咁樣會令掃毛內更容易積存細菌。

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup

（版權所有，未經同意不得轉載。)