早前Janice就慰勞各位同事請左大家去泰國玩左幾日，
小妹我真係第一次去泰國玩，
所以非常期待呀！
除左飲飲食食，當然唔少得就係去shopping啦！
出名shopping精既Janice今次竟然輸到比我地一眾同事，
同一班女仔去旅行，
真係唔可以睇小果種威力，
絕對可以全天候行街唔識攰！
飾物類我就無咩點買，
不過都買左啲好野想同大家分享，
當中梗係有買到雷野啦！
想知有咩就記住睇落去啦！

Covermark cream base

有留意開我地個blog既朋友都知呢支Covermark既base係我地既大愛，
出job無左佢真係唔得，
公司上次買既存貨就用曬，
所以Janice今次去到泰國都即刻買曬人地舖頭既存貨!!

呢支好岩乾性至極乾性朋友用，
搽完上去好滋潤，皮膚望上去都會好潤澤，之後上粉都會勁貼!!
出job遇到勁乾既model或者新娘我地都9秒9拎呢支base出黎用。

價錢唔貴大約港幣百幾蚊，
仲係Made in Japan,
facebook都即刻有好多朋友問我地可唔可以代購，
不過真係sorry啦！我地只係for出job同上堂用，
如果用曬我地都要即刻再入貨呀!!
所以去開泰國既你就可以去Covermark專櫃睇睇啦。
之前係網上見好多人代購Beauty Cottage既產品，
令我都心思思想試好耐，
今次親身去到當然要去朝聖一下啦！

（網上圖片）
見到個門口咁靚就即刻衝左入去，
唉，興奮到竟然唔記得左影相∼

係呢間舖頭我都失守買左好多野，
但就未全部開曬黎用（之後試左會慢慢同大家分享），
不過試左其中兩樣野覺得係必買要share!!

Beauty cottage Matte Bronzer  約＄120

好似我呢種圓臉人，無左shading真係唔得，
市面上既shading粉平貴都有但唔算太多選擇，
有既大品牌都一定唔會平，
而有d就太淺色，出黎個效果無咁明顯，
所以今次我都周圍搵下有無平靚正選擇。
見到呢個包裝真係想唔買都唔得，好vintage feel，好鬼靚∼
心唸….好唔好用都一定要買左先！！
除左個靚爆包裝之外，估唔到質素都幾好！

入面附送左個掃，毛質算幾滑仲有塊鏡，
當然我梗係會用番自己個shading掃啦∼

入面分面有3種唔同深淺既啞啡色，
通常我都會打圈一次過拎份量，
個色都岩岩好∼
粉質當然唔會激滑，不過都算好幼細，又上色，
驚太深色既朋友就唔好拎太多份量
可以係手背或紙巾印走多餘入量先上面。
出黎既效果就好自然。
佢仲係另一隻款係帶閃既Bronzer，
不過我覺得呢款出黎會自然好多。

Beauty Cottage Color Harmony 5 in 1 Shadow 約$100幾

eyeshadow佢都有好多選擇，
單色定palette都有，
顏色都好實用

今次揀左呢盒有粉粉橙橙既色黎買，
岩曬黎緊春夏天用。
pastel既顏色好多人驚難carry，
咁就可以揀番呢類帶有shimmer既顏色，
新手都比較易掌握。
而且佢好上色，又唔會飛粉 ，
平價眼影黎講可以話無野可以挑剔。
另外，不得不讚下佢個眼影盒quality好好，
好實淨，唔會易刮花，
用都用得開心d~

呢支蚊怕水係Janice介紹我地買，
我自己係個超惹蚊既人，
試過有一次去郊外地方唔記得噴蚊怕水，
之後咬到雙腳無空位剩，要幾日先退到紅。
之後就真係怕怕!!
之前試過幾款大品牌既蚊怕水，
噴落我度真係唔太work個味又幾臭。
早幾日去左拜山就即刻拎黎用，
細細支放手袋就最方便，
個味亦OK∼
我噴完仲借埋比屋企人用，
大家都無比蚊攻擊到，Good!!!
佢只係賣10幾蚊支，好抵∼
泰國好多超市都有得賣架!!
雷品警告：

 雖然今次旅行都買到好多正野，

不過都有中伏既時候!!
雖然我岩岩都對Beauty Cottage讚口不絕，
不過佢並唔係樣樣野都值得買…
大家都知香水對女仔黎講真係抗拒唔到。
見到3支香水咁靚又唔貴，
大將百幾蚊就有一支我就即刻買左∼

呢支就係傳說中同Chole一樣味既香水，
確實佢又真係幾似Chole既味，
另外兩支分別係爽身粉同甜味，
3支個味其實都唔錯，
本來咁平既香水我期望都唔太高，
不過都估唔到佢可以係半個鐘入無曬味
就算噴幾多下係身效果都一樣!!
所以想買朋友都唔好以為佢同香味可以扯得上關係，
因為陣味快散到你唔信，
噴完可以話無噴
噴止汗劑陣味仲long lasting過佢呀!!
而定惟有放係度當下裝飾啦∼

Beauty Cottage auto eyebrow ＆eyeliner

初時店員同我講呢支係可以眉筆＋眼線筆兩用時，
我都非常懷疑，做得眼線筆又點做眉筆呢？
畫出黎咪變左蠟筆小新？
不過泰國人確實鐘意畫到條眉好實好粗，
實在唔岩我地鐘意自然眉型既人用，
不過我都即管買黎當眼線筆試下。

顏色夠實，不過佢話明係防水但沖下水就會甩，
我試過出街用唔洗兩個鐘就變熊貓，
如果眼水多既朋友就要小心啦！眼油多既朋友就更加唔洗唸…
不過以上產品純屬個人意見，
可以比大家當係參考啦∼

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)