上一篇介紹左幾個南法既地方同好味既餐廳，
今次就繼續分享我喺Paris既食玩買行程同工作。
有睇前一篇都知道我今次出trip每日都落雨，
雖然無咩點影相同shopping，
不過最後我都有買到少少野同手信，
想知有咩推介餐廳同店鋪就要睇下今次介紹啦！

首先講左兩間餐廳先，
本身我自己就唔係話好食野，
不過由於今次無咩點shopping，
所以就勁食勁食！

(網上相片)

呢間餐廳位於Paris Mandarin Oriental，
今次係朋友帶路，所以開頭都唔知係食邊間，
一入到去就覺得「咦！咁熟口面」，
原來之前喺J2台介紹過，
因為呢間餐廳既裝修好靚，所以一眼就認得！

Camelia係一間好出名既餐廳，
而法國係好出名食鴨，
呢度亦有鴨，所以就點左黎睇下水準如何。

我地三個係share野食，
每碟既賣相都好ok，
不過坦白講，
呢度既鴨係明顯overdone左，
亦唔夠juicy。

呢份係龍蝦加啲紅菜頭，
我自己本身唔食蝦蟹類所以都無試到，
朋友食完話覺得ok啦，但就唔係太特別。

而呢份牛配薯蓉就完全overdone，
反而配菜薯蓉先最有驚喜，味道好好，
不過整體黎講都係失望居多。

最後我地都想食啲甜甜酸酸既甜品，
所以就揀左呢枝raspberry雪糕！
個waiter一開始都同左我地講係ice cream bar，
咁我地都無expect好靚，
果然∼真係無期望無失望，
下面係底座唔食得，真係得一枝雪條。

呢一間喺Paris黎講算係數一數二既餐廳，價錢都唔平，
不過以食物水準黎講我覺得一般，
但想食環境，睇靚人靚衫，要整個luxury感覺既話，
咁呢間餐廳就岩晒喇∼

Camelia
地址：251 Rue Saint Honoré, 75001 Paris

我今次住喺Paris Saint Honoré街頭，
最後一站就去左一間喺附近叫Flottes既餐廳，
喺Rue Cambon，同CHANEL總店同一條街，
Rue Saint Honoré係好大既長街，Rue cambon就係橫街，
餐廳就喺交界附近。

呢間餐廳都好出名，好多本地人去食，
我地見就腳，所以就揀左佢喇！
我地去食lunch時都要排隊，
不過等左一陣就好快有位喇。

呢度lunch既價格比較相宜，
我極力推薦比大家，黎到一定要試試！

今次當然又係食鴨，
我地點左個鴨脾同鴨胸，
估唔到好入味，好juicy，好淋，
完全唔韌！

值得一提就係左邊兩pat野，
其實兩個都係薯蓉，不過有少少唔同，
一個係普通薯蓉，我地都覺得好好味，好快就食晒，
另一款係芝士薯蓉，呢一個食幾啖就食唔到落去，
可能外國人會比較鍾意，
但比我感覺就好似食緊芝士薯蓉既香口膠，
好杰身，薯蓉比啲芝士扯住，
呢個口感我就唔係太鍾意喇…
啲芝士最少起碼可以拉起兩尺高，好誇張！
其實我好想影相，不過礙於呢間都係一間高級餐廳，
咁樣影相好似唔係咁好，所以最後就無影到。

其餘既野食都好好食，
好似係法國田螺，全部都好好味。

我地去到每間餐廳都有叫鵝肝食，
呢間係我地一致認為最好食！
如果大家行名店行到攰，
都可以黎呢度試下，值得一試！

呢度早晚既水準都好好，
雖然價錢都真係唔平，
不過一心諗住黎shopping結果無野買，
所以就將budget轉移去食野度喇。

(網上相片)

Flottes
地址：2 Rue Cambon, 75001 Paris

(網上相片)

講到行街，我第一站就去左Lafayette，
其實我自己對行百貨公司既興趣唔係太大，
如果要買名牌就可以去睇睇。
我自己比較鍾意行一間間shop，款式齊啲同多啲野睇，
呢度地下有個鞋部，我兜左圈都無買到野。

不過喺Lafayette買野退稅方面有好處，
喺入面所有shop買野湊夠170euro就有得退稅，
其實買袋買鞋就已經有得退，
但我自己就覺得去專門店買仲好。

其實耳環呢個brand我好鍾意，
香港亦都有，平時我都有睇開，
不過覺得佢個價錢偏貴，睇完就無買。

今次呢度有一部分做六折同半價，
再加埋退稅，價錢大約三百幾，
我自己覺得好抵，所以都買左幾對。

我本身鍾意綠色，加上呢個款都好靚，
所以佢無減價我都第一時間揀左，
之後見到白色同款有減價，都好易襯，所以就買埋！

其實佢地既官網都有show減價款出黎，
大家有興趣都可以去睇下。
link：http://www.lesnereides.com

岩岩上一篇講左Burberry既褸出trip可擋風防水，
今次都有去店睇野，不過價錢貴左好多。

本來我都無買野，最後喺outlet試左呢件，
我自己都好鍾意，但價錢唔算太平。

呢個款我朋友7月中左右喺London以正價買左，
輾轉間3個月已經去左Outlet！

初時我想買Classic款，同呢件差一千蚊，
不過呢件款式特別啲，所以揀左佢。

*Tips*

去Outlet就一定要去Information center，
佢地會有extra discount比遊客，
好似我去Burberry買野，買夠一千euro有85折，
再退埋稅等於75折左右，都算幾抵！
其他好多shop都有discount架，
建議大家睇左先行街，
同埋可以拎單去返center換asiamiles，
所以大家記得去左information center先啦∼

香港好多化妝師鍾意用呢枝base做打底，
我就買左幾枝比同事做手信，
喺法國買圍返一百蚊枝度。

地圖果度一排既藥房都有做優惠，
或者去Lafayette男裝部側邊果間藥房，
都好多特價，不過就比較多人，
如果想買返啲法國產品都可以去睇下。

呢兩款香水宜家香港都有得賣，
法國當然平好多！
係同行朋友試過好用推介，佢覺得味道好香又持久。
我今次就買左兩隻味，
上邊係朋友極力推介既鈴蘭味道，
而另一款就係Jasmine，味道好似白蘭花既清香，
呢個味其他brand比較少有，
同埋佢既香味比較持久，
無論自用手信都好唔錯，
機場都有counter賣呢隻香水，
如果臨到最後想買返手信比朋友就可以留意下啦！

去到法國，相信大家都有留意其他blogger推介必買RIMOWA，
諗起我之前既不愉快事件，
之後對啲唔係好出名既brand都唔係太有信心，
想知道咩事就可以睇返我舊blog，
link：http://www.girlstalk.hk/blogs/?p=23474

身邊有好多朋友都用RIMOWA，
今次終於屈服要買，
有朋友經常出trip，用7~8年都keep得好好，
香港買貴好多，
所以今次順道買左個最大size既篋，
扣埋稅都係4千蚊內，
呢個算係RIMOWA入面最平既一個。

呢個磨砂質料係新出既，會再輕身啲，
我覺得鐵果隻太重，
實用性黎講呢隻比較適合。
其實佢地仲有出膠面，比呢款貴一千蚊度，
不過無咁易刮花，
我自己就鍾意呢款多啲又唔介意刮花，
出trip刮花都好正常，所以就揀左呢款喇！

*Tips*

買篋千祈唔好去Lafayette，
我亦都去過春天百貨，不過款式唔太多！
佢其實喺巴黎有幾間分店，
大家可以去返St Honoré果間La Bagagerie睇，
我今次就去羅浮宮對面岸(巴黎第7區)果間La Bagagerie買，
由羅浮宮行過去20mins度，果一帶亦好安全，
附近係傢具店同畫廊，行既時候都可以放心睇下其他野。

其實我之前果啲篋都要千幾蚊，但用年幾就要換，
比較過，RIMOWA既轆的確好好多，
即使裝重野都行得好順，
加上法國買又平啲，
所以我覺得都值得喺法國買返黎既！

之後途經一條街，見到文具店，
大家估唔估到係咩黎呢！

其實呢個好實用，係擦子膠同筆刨。
當然我就唔捨得拎黎用，
因為個蘑菇好得意，所以買返黎當裝飾，
價錢都唔平架，70蚊左右，
不過個款好特別，香港無見過類似，
所以就買左返黎。

另外，有個地方想推介比大家！

就係呢個dept store附近，
呢條街好多特色野，
有古董錶、鞋、本土野等等，好多野睇，
如果唔想行死名店，建議大家可以行下呢條街。

(網上相片)

而呢個dept store好少亞洲人，
大品牌當然有，
但當中亦有唔少唔係大路brand，
好多特色野睇，
如果大家鍾意化妝護膚品，
呢度就有超多唔認識既品牌但quality好好既產品，
全部都好吸引！
有時間既話可以睇下∼

今次出trip落雨真係好少影相，
趁最後幾日好天少少所以就影多啲相，
其實今次都係去做野為主，幫本magazine化妝set頭，
不過當中都有個小插曲，
就係我地去到當地先知book唔到model，
好彩之前識得一位韓國model，
記得佢講過有韓國朋友喺Paris做model，
即刻facebook問佢，
好快就book到一個非常專業既韓國model。
好彩宜家科技進步，有wifi跟身，可以連絡到其他人，
如果唔係都幾麻煩。

今次既分享就到呢度，
如果大家去Paris就不妨參考下我今次既行程啦！