我一向對化妝都有極高要求，
不單要改善技巧，更要求與時並進，
因為現時妝容潮流走得快，季季轉款，
不時要自我增值，先可以更進一步。

而SHISEIDO今年都將成個品牌形象年輕化，
仲要投入追櫻花熱潮，
推出一系列櫻花美白系列！
一睇個包裝已經非常吸引啦∼
不過究竟櫻花有咩特別之處呢？

我早前就去左上海親身體驗啦，
多謝SHISEIDO邀請我出席佢地既發怖會，
除左可以率先試用新品，
仲了解更多佢地今年既各樣轉變、一連串改革，
實行將品牌推向國際。

其實早前我都喺facebook提過
SHISEIDO會起用3位新面孔既model，
以前佢地都會起用亞洲model為代言人，
（我都好喜歡以前果種日式公仔妝容廣告，
比人感覺好神秘、多樣化）
但今次就大革新，起用3位唔同國籍model。

而喺發佈會上，品牌總監Yoshiaki Okabe亦都指出，
無論係任何國家、地方既女性都擁有唔同特質，
我地識得表現自己美態之外，
同時要尊重其他人、分享美麗，
所以今次佢地就揀選左3位分別黎自匈牙利、荷蘭、
以及一位4國混血model擔任廣告model，
展現出「美」既多樣性。

當日我亦有幸可以亦率先見證品牌既全新專櫃概念，
用上簡約紅白色主題設計，
有別一般日本counter，
今次以顧客體驗為先既全開放式counter，
減少隔閡之餘，仲可以比客人同時睇到、
試到護膚品同makeup產品，
黎緊大家都可以親身體驗到喇！
呢類同客人close啲既模式相信之後亦會漸漸被其他品牌採用，
因為舊式design成日會令客人怕怕，
驚向BA查詢，又怕企喺度唔買野好尷尬，
宜家既新design就可以多啲互動啦∼

當日完左所有talk同介紹之後，
夜晚SHISEIDO亦有設宴招待，
我仲帶埋自拍燈去周圍同人影相，
大家都大讚盞燈好正，
連在場攝影師都好有興趣，話好得添呀！

大家都知道日本品牌推出既美白產品都係數一數二，
佢地經常都會投放資源仔細去研究美白成分，
今次已經係我第2次出trip去參加佢地既美白產品發怖會，
在我角度黎講，美白緊唔緊要呢，
我會覺得亮白、均勻膚色更緊要，
一般人只會focus喺美白，而忽略亮白、淨白，
但SHISEIDO既產品就同時做到三種效果，
就好似改善面部暗啞偏黃膚色等。

當日發怖會上邀請左慶田朋子醫生
同負責科研既牟田惠子小姐，
大家都問左好多有關美白療程同保養皮膚等問題，
我相信讀者有好想了解多啲，以下都會簡略講下。

專業既美白療程一般可以改善大部分色斑，
但有超過20種皮膚病都同色斑好似，
例如老人斑、黃褐斑、色素沈澱等等，
如果有多種唔同既斑同時出現會阻礙根治，
而現時喺日本最流行既係做激光療程，
當中又以脈衝激光最多人採用，
因為相對其他，呢個療程痛楚較低，
復原時間亦比較快，成本亦較平，加上效果顯著，
好多人都會去做呢款激光。

亞洲女性比較容易形成黃褐斑同色素沈澱，
朋子醫生比左幾個建議大家，
可內服Vitamin C同傅明酸，
外塗美白成分產品，接受醫學光療，
以及平日要做好防UV程序。

現時好多人都會接受色斑、美白等醫學療程，
不過就有唔少人質疑點解做完光療，啲斑仲多左同深左，
其實呢個過程係正常既，
而做完光療之後係應該配合良好既護養，
色素就可以慢慢淡褪。
乜都唔做只會好快打點原形，
最好就係keep住用美白產品，雙管齊下令色斑絕跡。

講返櫻花系列，其實呢個係WHITE LUCENT既升級版本，
亦係美白史上首個結集醫學美白及家用美白既修護系列！
所以係集合左兩方面既優點，
提供雙重速效美白對策，直擊色斑，
帶黎持久顯著、快速透白既修護效果。

當中應用左專業美容療程原理及深入鑽研既高效成分，
開發4款獨一無二雙重美白祛技術，
當中MicroTarget Technology主要幫助皮膚
提升角化作用至最佳狀態，
針對異常既角化狀況，穩定角質層。

而SHISEIDO獨家開發既櫻花抗斑技術主要成分
原來係黎自淡粉紅色既日本染井吉野櫻，
佢可以有助提升黑色素抗力。
紫外線、其他外界刺激都會向黑色素細胞發出訊號，
訊號會被傳送至色斑部位，
令色斑繼續加深，促進製造黑色素，
櫻花抗斑技術既原理就係抑制表皮層訊號，從而減少色斑形成。

4款產品包括：
WHITE LUCENT MicroTargeting Spot Corrector，
WHITE LUCENT MultiBright Night Cream，
WHITE LUCENT Luminizing Surge，
WHITE LUCENT Luminizing Infuser。

當中既Infuser同Surge都不含酒精，
於美白療程後使用都唔怕刺激皮膚，
更可紓緩療程後既泛紅情況，
而整個系列都可以喺療程前、後使用，
延長顯著既美白效果。

好多時我地用美白產品都唔會分日、夜霜，
今次呢個系列就有埋夜霜，
利用晚上訓覺時間提供修護效果，
促進「月光修護因子」，
呢個因子其實係一種美肌元素，但會經日間氧化而減少，
所以呢款晚霜可以修復日間傷害、
改變暗啞，加強減斑成效，
係今個春夏必備既美白產品黎架！