今朝瞓到11點幾先醒，起身先見到原來低能仔 whatsapp 過我，但我攰到連電話響過都唔知-_-///

醒咗之後，我去咗香港仔睇醫生，因為星期四淋過雨之後，我半夜又係咁咳，咳到根本無得瞓之餘…… 仲要俾人話我嘈得滯，所以迫我去睇醫生~(*+﹏+*)~

睇完醫生食埋嘢就返咗屋企，返到去家姐同我講咗一件我完全無諗過嘅嘢，聽到嘅時候，我真係唔敢相信，同時亦覺得有啲心寒！嗰個 Auntie 響我細個嘅時候湊過我，佢係一個好斯文嘅人，而且仲好好人，好錫我，所以聽到嗰件事時，我真係好震撼！但諗番今日同佢一齊搭電梯時，我的確見到佢拎住咗家姐所講嘅嘢！點解佢會變到咁？？知道呢件事後，我有諗過同唔同低能仔講，唔講又好似唔係咁好，好似過唔到自己嗰關，始終都……但講出嚟我又好怕嗰個 Auntie會有事喎！猶豫咗一陣，結果都係講咗！講完個心舒服晒！

今日佢收工之後，我上咗佢到(^3^)好耐都冇同佢響屋企2人世界喇！好掛住以前2人世界嘅日子，我哋響屋企佢都可以坐得舒服啲，佢攰嘅時候都可以休息吓！起碼唔使佢好似依家咁，放咗工咁攰都要出嚟陪我，陪我響老地方坐，又陪我行海怡……所以好多時唔捨得佢咁早走，我都要佢返屋企！ even佢返到去只係玩電腦，點都叫可以休息吓、relax吓……總好過響街陪住我！

上咗佢屋企一陣，我地就一齊落街食飯，今晚有人俾我捉咗去椰林閣食飯，原本有人唔肯去，但最後都要屈服，哈哈！我唔想佢成日都食 KFC，我就逼佢去咗椰林閣！其實之所以選擇去椰林閣，係因為我記得佢有一篇blog 係話佢響香港仔珊瑚堡食嘅晚餐，我估佢應該係鍾意食呢啲嘢，所以我好想同佢去食佢鍾意嘅嘢，兼且我希望同佢做啲佢鍾意做嘅嘢，因為我知道我有一日要離開佢，我想響離開佢之前，儲多啲我同佢嘅回憶，就算將來同佢分開咗，我都仲有呢啲 memory 話俾自己知“我幸福過”!

其實我除咗鍾意瞓醒就收到你msg，我仲鍾意臨瞓前收到你嘅 Goodnite架