不經不覺已經嚟到中秋節喇！我哋冇特別嘅慶祝，冇特別嘅活動，大家只係各自各同自己嘅家人做節後，就平平淡淡咁響老地方見面，呢種平淡令人覺得好舒服，好滿足！只因為曾經我以為我同佢未必過到中秋，估唔到我竟然可以攬住佢一齊過呢個中秋<3呢一切都好似好唔真實咁！
今晚響阿麻到食完飯後，就陪阿麻拜神！我記得小時候，每逢中秋節爸爸都會接我放學，然後就帶我買燈籠同蠟燭響阿麻屋企門口玩，爸爸次次都會話“阿妹，妳揀個自己鍾意嘅燈籠啦！”不過我揀親邊個，佢都會話唔好！揀電燈籠又話幼稚，白兔燈籠又話容易燒著，最後就迫我買嗰啲用玻璃紙造嘅楊桃燈籠。。。但最終咪又係一支蠟燭都未燒完，個燈籠已經著晒火，燒剩得番幾支竹，多舊魚！！
燈籠燒咗冇嘢好玩，就玩燒螞蟻、燒花生、燒香蕉皮，響到扮大人煮飯，記得有一次燒燒吓香蕉，爸爸聞到陣香味走出嚟睇，然後講咗一句好香之後就呆咗！因為啲蕉皮燒到痴住晒阿麻門口個地下，仲要痴立立。。。搞到佢嗰晚要洗乾淨個地下先走得！自此之後就唔夠膽再燒香蕉，改為燒月餅。。。而啲堂阿哥就轉玩煲蠟，一淋啲水落去時，啲火噴到好高，嚇到爸爸即時O咀，從此每次玩親蠟燭，身邊就會多部CCTV，因為爸爸話怕有朝一日，我哋燒到冇嘢好燒，燒埋阿爺個神主牌，哈哈！！好懷念呢啲兒時回憶。。。
尋晚佢去咗學 Photoshop，放咗學就返咗嚟陪我。。。或者因為我覺得我同佢之前響巴士影嗰兩幅相唔襯佢，加上佢阿姨前晚講嘅嘢，呢兩日我成日都諗我係咪襯佢唔起呢？所以我覺得有壓力，兼且有種想離開香港抖抖氣嘅衝動！多得你同 Cherry，如果唔係我應該錯過咗同你一齊渡過第一個節日嘅機會！
尋晚臨走嘅時候，佢突然問我係咪好怕俾人搶走佢？呢句說話我曾經問過自己，我的確好怕失去佢，但係如果佢可以更幸福、更開心的話，我願意放佢走！只要我有好好珍惜過我依家所擁有嘅嘢，我有好好愛佢、對佢好、盡咗我嘅能力去令佢幸福咁就已經足夠！最起碼我哋已經擁有最開心、最幸福嘅回憶……
低能仔，今個中秋雖然過得平淡，但我已經好滿足，好幸福！因為有你，一切就變得唔同晒！多謝你。。。
分類: 我們的生活點滴 |
