今朝瞓醒好似好咗好多，已經冇乜流鼻水同咳，只係仲有啲燒同埋好攰。。。
仲有20日就飛沙巴喇！其實仲有好多嘢未買，原本諗住買張沙巴嘅無限上網咭過去，但其實有冇必要呢？或者冇得隨時隨地上網會好啲嘅。。。不過我又會唔會唔習慣呢？
今日晏晝約咗低能仔響灣仔，佢要響298買嘢，而我就響付近等佢！等佢買完嘢，就陪咗佢去食嘢，跟住就去咗188！不過就好似佢有佢行，我有我行咁，因為佢上咗188揾朋友，每一層都有佢識嘅人-_-///我唯有一路行一路等，直到佢上到2樓再揾另一個朋友時，我whatsapp 佢我自己走先，嗰一刻我真係有啲憫憫哋，但又唔係發皮氣，只係食咗啲藥先係咁！兼且我覺得嗰一刻自己走先可能會好啲，咁佢就可以慢慢傾，唔使顧慮仲有個我企咗響到等佢！
返到嚟見到 Fung今日嗰扎花，響到諗點解會有人咁好心機每日一扎花？佢嘅堅持的確令我有啲感動，我感覺到佢對我真係好好，突然響到諗Fung對我嗰種好，唔知似唔似我對低能仔咁呢？我對低能仔嘅愛，又似唔似 Fung咁對我呢？
今晚低能仔上咗嚟陪我，佢一見到我就同我講叫我唔好嬲！因為 “她”今晚揾佢聽晚去表演！聽到嘅時候，我真係好唔舒服，我唔知聽晚過後，我同佢會唔會變得唔再一樣？我亦唔知佢係咪已經揀定咗？突然好驚一切都會隨住聽晚而完結，雖然我係怕。。。但我冇叫佢唔好去，始終呢個係佢嘅選擇，而我亦只能夠信任佢、支持佢！
低能仔，你聽晚要比心機！一定要為自己鍾意做嘅事用盡全力去做，為自己鍾意做嘅嘢堅持落去，知嘛？！
分類: 我們的生活點滴 |
