尋日請咗假，今日一返到去見到間鋪我真係呆咗。。。我以後都唔夠膽請假喇！因為返到去執到隻狗咁∼
今晚低能仔依舊嚟接我收工，見到佢我覺得自己好幸福！連 Icy都話好羡慕我有個咁錫我嘅男朋友♥
其實我覺得自己唔配擁有一個咁好嘅男人！佢會為咗我，由一隻冇腳嘅雀仔，努力改變為一隻有腳嘅雀仔！佢會為咗我，堅持每晚等我收工！佢會為咗我，就算有幾唔願意，都一一改變佢嘅壞習慣、佢嘅皮氣！相反我……
自從手術後，我都會有抽筋嘅情況出現，只係一直冇響佢面前出現過，但我最唔想、最怕俾佢見到我咁嘅樣，今晚終於都發生咗！
嗰種痛令我不停出冷汗，嗰種痛令我痛到想喊，嗰種痛令我感到好攰！平時屋企人見到我咁，都會好知點咁，尤其平時冇乜嘢嘅爸爸，見到我咁都會眼濕濕！所以我唔想俾低能仔見到我呢個咁痛苦嘅樣，點解要我響佢面前咁？！咁樣俾起抽筋嗰種痛，令我更難堪。。。
嗰一刻低能仔不停幫我按摩，不停幫我抹汗。。。望住佢咁緊張嘅樣，我真係覺得自己唔配擁有一個咁好嘅男人，佢應該擁有一個身體健康嘅女朋友，佢應該擁有一個唔使令佢擔心嘅人。。。但嗰個唔會係我！
分類: 我們的生活點滴 |
