尋晚成晚都冇瞓過，一直諗番同低能仔相遇、相識、曖昧……直到依家嘅一切！下個月佢媽咪返香港喇，突然諗番對上一次佢媽咪返嚟前一晚嘅情影，同埋我對佢所講嘅一番說話：
“ 眨吓眼我地已經識左2個月了，
時間過得真係好快，
今日已經係最後一日！
我好唔捨得……
係咪過埋今日之後，
我地要一個向左走，
另一個就要向右走？
雖然呢兩個月我可以為你做嘅野好少，
但我已經覺得好幸福！
假如時間可以返轉頭嘅話，
我希望可以重新認識你，
等我可以重新愛你多一次！ ”
唔知今次佢媽咪返嚟，我哋又係咪要少啲見面呢？！
今日我哋兩個都放假，原本plan咗一連串嘅節目，但最後有啲有做，有啲就放棄咗！起身搞掂晒啲嘢後，我哋就去咗西環探佢爸爸，途中遇到佢家姐，其實唔止佢緊張，連我都好緊張！傾咗一陣，低能仔就帶咗我走，因為我哋下一站係飲涼茶同睇戲。。。
但當去緊飲涼茶時，我終於都知道點解佢家姐一見到我個樣會咁猶豫，原來佢身邊嘅朋友同家人，根本唔知有我嘅存在，同時亦唔知道佢哋已經分開咗！依然以為低能仔身邊嗰個仍是“她”……
聽到之後，我不停深呼吸叫自己唔好諗，甚至唔理碗涼茶有幾熱，都係咁照飲落去。。。我覺得自己好似係代替品，我覺得我響佢身上係有一個位置，但根本就冇身分，個個都以為“她”先係佢女朋友！直到佢問我做乜時，我忍咗好耐嘅眼淚係咁流出嚟。。。好辛苦！
最後我哋冇去睇戲，變咗佢去按摩，我去行街。。。我知佢好攰，但又唔想掉低我一個，所以我就迫佢去。。。我只係希望佢唔好咁攰！佢按摩完就即刻嚟接番我，今晚我哋終於都去咗打B爐喇。。。好暖！有佢我真係覺得好暖。。。。
今日除咗撞到佢家姐外，其實仲有我家姐。。。突然覺好似家長日咁！
分類: 我們的生活點滴 |
