尋晚兩點幾就瞓， 但今朝又6點幾咳醒咗，之後瞓番，一瞓瞓到下晝兩點幾。。。不過依然好攰好眼瞓💤
起身之後，就趕住返醫院抽血同打針。。。原本想今日唔去住，因為每次打完針都會好攰，加上今日又要去靚仔醫生到覆診，然後又約咗低能仔，啲時間好趕。。。我唔捨得要佢等我！但睇番 roster，今日再唔去抽，就再冇時間可以過去喇！
響醫院打完針之後，個人更加攰，搭車出靚仔醫生到嘅時候，響車都瞓得著，就連去到診所探熱時都瞓著咗，要 Judy嚟拍醒我😓我先識得醒，哈哈！！靚仔醫生話我條氣管又差咗啲，呼吸能力下跌番到4成。。。所以仍要食抗生素多三日！三日後要食多一個療程嘅類固醇，如果到時再冇咳同呼吸能力上升番，咁就可以嘗試停類固醇。。。
睇完醫生嘅時候，低能仔已經出緊旺角等我，我即刻去萬寧買埋濕紙巾比佢先過去，因為佢呢排太忙，又多功課又要返工，仲要就快考試，我唔想佢咁辛苦，可以為佢分膽到嘅，我都想為佢做，呢啲叫幸福♥
今晚陪佢睇鏡頭，其實我真係唔識架！但見佢睇得咁入神，我又好自然咁跟住佢睇，當佢同我解釋支鏡頭有乜嘢用嘅時候，我竟然覺得有興趣，而且亦好留心咁聽佢講，係你改變咗我嗎？今晚個傻佬仲帶我睇相機，佢話想買比我同我去旅行時用，佢不停問我鍾意邊部？但我拖實佢同佢講，我就係鍾意低能仔！個傻佬聽到之後就響到笑。。。你知嘛，如果每日都可以見到你笑，我已經好開心、好滿足！因為你就係我嘅一切。。。
睇完鏡頭同相機，低能仔同我去咗食我好掛住嘅煲仔飯，兼且仲陪我食我好想食嘅許留山，個傻佬根本唔啱食，但依然陪我食。。。好傻！食完之後，我就去揾7仔，我好想揾嗰支雪糕比佢，因為佢陪我食許留山，我就想陪佢食佢想試嘅雪糕，兩個人咁相處，其實都係一件 sweet嘅事，你陪我做我想做嘅嘢，我陪你睇你想睇嘅嘢♥今晚你買比我嘅低能仔相紙，我真係好鍾意好鍾意。。。我要留番同你去台北嘅時候影！
不是走過這條路，那會知道轉彎還有更美風景？不要害怕是走遠路，更不要害怕走錯路！
分類: 我們的生活點滴 |
