放咗假已經幾日喇！呢幾日大部份時間都響屋企，但我發現返工會開心過留響屋企，因為我真係唔鍾意嘈嗰種感覺，我好想每次返到屋企都係開心，都係靜，唔通真係咁難？
尋晚低能仔影完相10幾就返咗嚟，見到佢，我所有嬲嘅感覺都冇晒！同時佢俾咗4個‘乜都得’我，我只係用咗一個，而呢樣嘢係我第二次要求佢做，佢響我面前即時做咗，我知道我呢個要求好自私，但咁樣我先覺得安心一點！
其實我都唔係一個好女朋友，諗深一層，佢每晚都堅持等我收工，相反我放假嘅時候，我就響屋企舒舒服服咁食飯，然後等佢返，但佢從來都冇怨過我，從來都冇出過聲！其實有時當我哋以為自己付出咗好多，為對方做咗好多嘅時候，我哋只不過做得好少。。。相反佢尋晚做咗一啲嘢，令我知道我應該要為佢做得更多，体諒得佢更多。。。
尋晚當佢返到去時，隔咗一陣佢就揾我，個傻佬一路做嘢，一路陪我！我知道唔係人人都可以做到咁，佢怕冷落我所以就算份嘢有幾趕都好，佢都寧願一路做，一路同我 whatsapp，坦白講，其實連我自己都未必做到呢份心意！睇到佢咁，我只能同佢講叫佢唔好理我，要專心做嘢！我以為佢會話好，點知佢竟然話“但妳瞓覺時一定要話我知！”呢一刻我覺得好窩心，因為我哋每晚臨瞓都一定會同對方講 Goodnight！
呢幾日因為我哋嘅問題，我都覺得好攰，但原來我冇諗過佢都需要抖吓氣，一直以嚟我都好鍾意佢影嘅相，同佢一齊耐咗，我先發現我遺忘咗一樣好重要嘅嘢，當日我未識佢時，已經有睇佢個 blog，我唔係好早已經俾佢影嘅相吸引架咩？低能仔，只要時間安排得好，我想你多啲約朋友去影相，好冇呀？
今晚唔知我嚟接你收工，你開唔開心呢？我應承你，我會做一個令你自豪、体諒你嘅女朋友！
分類: 我們的生活點滴 |
