唔知點解，我覺得今晚寧靜得特別可怕！這是暴風雨嘅前夕嗎？
今日唔使返工，而低能仔亦因“佔中”事件，而放假一日！好難得可以成日都響埋一齊嘅假期，呢一日對於我嚟講係一個 bonus😚
今日成日都同低能仔一齊，好耐都冇試過可以陪我咁耐喇！有人下晝嘅時候，話想去銅鑼灣。。。起初我以為佢想自己出去，所以我話只可以俾佢去銅鑼灣，但唔准佢去金鐘同中環！點知佢問我去唔去？
其實經過尋晚睇到一連串嘅新聞，我始終都好擔心佢會有危險，佢問我一唔一齊去嘅時候，我諗都冇諗就話“好”！因為我真係擔心佢，我明白就算我一齊去，即使有危險，我都做唔到啲乜！但我只係諗，如果佢自已出去，假如有啲乜嘢事，留低我一個咁我點？倒不如我哋一齊出去，就算有事都可以一齊面對。。。只希望佢唔好掉低我，留低我，我寧願有事都一齊有事。。。
今日佢返咗鋪頭一陣，而我就響sogo等佢。。。成個銅鑼灣都係人，突然 sogo又話要閂門，感覺好似暴風雨前夕咁，嗰一刻我企響條街等佢時，我真係覺得驚！好驚低能仔落嚟時，會突然會有個催淚彈飛埋嚟，好驚低能仔揾唔到我，好驚見唔到低能仔，好驚。。。直到見到佢我即時安心返，即時開心返！原來我愛佢嘅程度，遠遠超出自己嘅相像。。。
低能仔，你要應承我，聽日無論如何都唔可以去金鐘、旺角、銅鑼灣“所有“嘅示威地方！我唔想你有啲乜嘢事……你唔可以掉低我一個！
分類: 我們的生活點滴 |
