尋晚返到屋企，我一直都冇覆過低能仔 whatsapp，我未試過咁對佢。。。望住佢 send嚟嘅 whatsapp，我不停響到諗，係咪我每次都太容易原諒佢，而令佢覺得即使傷害咗我，我都會原諒佢？我都唔會走呢？
尋晚成晚都瞓唔著，我反覆咁問自己，我到底應唔應該原諒佢多一次？我有諗過長痛不如短痛，因為每次佢話會改，會係最後一次，但依然都仲有下一次！
我最後都唔捨得唔要呢段感情，唔捨得唔係因為經營嘅時間長短，而係我好想信多佢一次，我對佢仲有期望，只係唔多唔少有啲嘢已經改變咗！我知道我對佢嘅信任又要重頭開始再儲過，我亦知道呢條路唔易行，兼且我亦相信今次真係我俾你嘅最後一次！
“情願暗裡妒忌，沒法討厭你，片段卻逐秒儲起！如果忍痛放棄，也至少傷不到你，原諒我目前錯不起！”
今朝6點 whatsapp完低能仔後，我先瞓。。。今日佢明顯揾多咗我，亦細心咗！但其實我好怕唔知佢又會維持幾多日，又變番好似之前咁！原本今晚約咗人食飯，但最後我都決定等埋佢拍完嘢先一齊食。。。
低能仔，你可唔可以愛我多一啲？為我諗多一啲呀？你成日怨我唔信你，其實係有原因架。。。你可唔可以為咗我做返啲嘢，去令我再一次100％相信番你？希望你可以睇下，下面條link講嘅嘢，可以嗎？
分類: 我們的生活點滴 |
